Djokovic retírase e non loitará por gañar o seu undécimo Aberto de Australia

O serbio Novak Djokovic abandonou o partido de semifinais do Aberto de Australia despois de que o alemán Alexander Zverev gañara o primeiro set por 7-6 logo dunha hora e 21 minutos de xogo. O campión dez veces en Melbourne non puido superar a lesión sufrida no treito final do primeiro set no partido de cuartos de final contra Alcaraz. 

O campión de 24 Grand Slams estivo no foco das críticas durante os dous últimos días en Australia tras a vitoria ante o murciano e despois de recuperarse dunha doenza na zona isquiotibial nese partido. Ao rematar o encontro Djokovic descubriu que a lesión era seria e non sabería se podería xogar o seguinte partido. 

Novak Djokovic, de 37 anos, realizou todo o quecemento previo sen problemas e xogou un set de longos intercambios de golpes contra un Zverev que prolongaba os puntos buscando gañar o partido desde o aspecto físico. Ao final acadouno por abandono do rival e loitará polo seu primeiro grande. Xa xogou as finais en Roland Garros e no US Open pero acabou perdendo as dúas.