Trump xura o cargo de presidente proclamando o comezo da "idade de ouro" dos Estados Unidos

Donald Trump asumiu este luns o cargo como o 47º presidente dos Estados Unidos, tras resultar vencedor nas eleccións xerais do pasado mes de novembro.

Comeza así, o seu segundo mandato, despois de permanecer de inquilino da Casa Branca entre os anos 2017-2021.

Debido á vaga de frío que afecta o país,  Trump xurou o cargo na Rotonda do Capitolio dos Estados Unidos, a sede do lexislativo norteamericano. 

 

 

O presidente comezou o seu discurso incuaugral declarando que a "idade de ouro" dos Estados Unidos comeza "agora mesmo". " A partir deste momento o declive dos Estados Unidos rematou", dixo Trump.

Emerxencia Nacional e envío de tropas á fronteira con México

O novo presidente anunciou que a súa primeira medida será declarar unha "emerxencia nacional" na fronteira sur e que designará os cárteles mexicanos organizacións terroristas.

"Toda entrada ilegal será detida inmediatamente e comezaremos o proceso para devolver millóns e millóns de estranxeiros criminais de volta aos lugares dos que viñeron.  Imos reinstaurar a miña política de 'quedade en México'", dixo o presidente no seu discurso. "E enviarei soldados á fronteira sur para repeler a desastrosa invasión do noso país", engadiu Donald Trump.

Retomar o Canal de Panamá e rebautizar o golfo de México

Donald Trump rometeu renomear o golfo de México como golfo de América e prometeu retomar o control do Canal de Panamá.

"Fomos moi mal tratados por este imprudente regalo que nunca tivemos que entregar e a promesa de Panamá rompeuse. O propósito do noso acordo e o espírito do noso tratado foi totalmente violado. Os navíos estadounidenses están a ser sobrecargados con tarifas e non os tratan de maneira xusta", aseverou.

"China está operando o canal de Panamá. Pero non llo demos a China. Démosllo a Panamá e imos retomalo", engadiu.

Emerxencia enerxética nacional e saída do Acordo de París

 O presidente estadounidense declarou ademais a emerxencia enerxética para impulsar a extracción petroleira no país e retirará novamente á nación do Acordo Climático de París, do cal xa se saíu durante o seu primeiro mandato (2016-2021).

"A crise de inflación débese a un sobreconsumo e unha escalada de prezos da enerxía e por iso hoxe declaro  unha emerxencia enerxética nacional e imos perforar, perforar, perforar", declarou Trump no seu discurso inaugural no Capitolio.

Europa e España agardan traballar "estreitamente" con Trump 

A Unión Europea (UE) manifestou este luns o seu desexo de traballar "estreitamente" co novo presidente dos Estados Unidos, Donald Trump, para afrontar os desafíos globais, lograr maior prosperidade e fortalecer a seguridade común e a asociación transatlántica entre ambas partes.

Ese foi a mensaxe idéntica que lanzaron simultaneamente nas súas redes sociais a presidenta da Comisión Europea, Ursula von der Leyen, e o presidente do Consello Europeo, António Costa.

"Os meus mellores desexos, señor presidente Donald Trump, para o seu mandato como 47º presidente dos Estados Unidos", escribiron Von der Leyen e Costa nas súas mensaxes.

Best wishes President @realDonaldTrump for your tenure as 47th President of the United States.

The EU looks forward to working closely with you to tackle global challenges.

Together, our societies can achieve greater prosperity and strengthen their common security.

This is…

— Ursula von der Leyen (@vonderleyen) January 20, 2025

 O rei de España, Felipe VI, enviou un telegrama a Donald Trump no que expresou os seus parabéns e indicoulle que está seguro de que as relacións entre os dous países "continuarán fortalecéndose".

"Querería expresarvos os meus parabéns pola vosa investidura como presidente dos Estados Unidos de América", transmitiu o rei a Trump.

 O presidente do Goberno, Pedro Sánchez, felicitou a Donald Trump e indicou que espera poder traballar coa nova administración estadounidense para "abordar os desafíos globais comúns".

Nunha mensaxe en X uns minutos despois de que concluíse o discurso de investidura de Trump, tras expresar as súas felicitacións, Sánchez sinalou ademais que espera que España e Estado Unidos poidan "fortalecer a relación estratéxica".

Enhorabuena a @realDonaldTrump por su investidura como el 47 presidente de Estados Unidos. Esperamos trabajar con la nueva Administración de los Estados Unidos para fortalecer la relación estratégica entre nuestros países y abordar desafíos globales comunes.#EUUS 🇪🇺🇺🇸

— Pedro Sánchez (@sanchezcastejon) January 20, 2025

 

Mandatarios de dereitas e os magnates da tecnoloxía entre os convidados

A presenza de líderes estranxeiros non é moi habitual nas inauguracións presidenciais estadounidenses pero Trump decidiu exhibir a unidade da dereita internacional que abandeira: Ao acto asisten o presidente de Arxentina, Javier Milei, a primeira ministra italiana, Giorgia Meloni ou o presidente do Salvador, Nayib Bukele.

Na listaxe de invitados europeos non figuran altos cargos da Unión Europea pero si os aliados de Trump, como o primeiro ministro húngaro, Viktor Orbán, o euroescéptico británico Nigel Farage, o axitador de ultradereita francés, Éric Zemmour, ou o líder de Vox, o español Santiago Abascal. O presidente da China, Xi Jinping, declinou a invitación e enviará no seu lugar ao vicepresidente do país, Han Zheng.

Entre os asistentes están os máximos executivos de Tesla, Amazon e Meta, Elon Musk, Jeff Bezos e Mark Zuckerberg, respectivamente.

Tanto Amazon como Meta están entre as empresas que fixeron doazóns a Trump na súa campaña e Musk (chamado a ocupar un cargo na nova Administración) gastou máis de 250 millóns de dólares. Tamén se espera que asista o director executivo de Tik Tok, Shou Chew.

Dous mandatos dun presidente convicto

Trump convértese no segundo presidente na historia do país en cumprir dous mandatos non consecutivos, seguindo os pasos de Grover Cleveland en 1892. Será o máis lonxevo da historia, ao acceder ao cargo con 78 anos e sete meses.

Será ademais o primeiro presidente convicto da historia nun xuízo penal, xa que accede á Casa Branca tras ser declarado culpable de 34 delitos polo caso Stormy Daniels. Condenado pola xustiza, aínda que indultado polas urnas, regresa á Casa Branca para inaugurar este luns a 'segunda era Trump'.