Yoon defende ante o Constitucional a súa fe na democracia lberal

O presidente surcoreano Yoon Suk-yeol subliñou este martes ante o Tribunal Constitucional a súa "fe na democracia liberal", na súa primeira intervención no xuízo político na súa contra motivado pola súa declaración da lei marcial o pasado decembro.

"Desde que cumprín a maioría de idade vivín con fe na democracia liberal ata o día de hoxe, e especialmente durante os meus mandatos públicos", explicou Yoon, que tivo unha prolífica carreira como fiscal antes de gañar as presidenciais en 2022.

"Xa que o Tribunal Constitucional é unha institución que existe para defender a Constitución, solicito aos maxistrados que me valoren favorablemente en varios aspectos", explicou o presidente, que asegurou que a súa declaración deste martes, que supuxo a súa primeira comparecencia nun lugar público desde o pasado 3 de decembro, sería breve.

Sen o uniforme de preso

Yoon puido cambiar o uniforme que lle asignou o pasado domingo o centro de detención en Uiwang (ao sur de Seúl), no que está detido de maneira preventiva desde o 15 de decembro, e lucir un traxe para presentarse ante a corte.

A de hoxe é a primeira comparecencia do mandatario ante o Constitucional, debido a que se ausentou das dúas vistas preparatorias e das dúas primeiras vistas ordinarias celebradas no tribunal os pasados 14 e 18 de xaneiro.

O máximo tribunal surcoreano ten ata xuño para decidir se o cesamento de Yoon aprobado polo Parlamento o 14 de decembro por declarar o estado de excepción 11 días antes será definitivo ou se o restitúe no cargo. No caso de que a súa inhabilitación quede ratificada deberán convocarse eleccións presidenciais adiantadas nun prazo máximo de 60 días tras a sentenza da corte.

Yoon encara á súa vez unha investigación penal por un posible delito de insurrección que podería castigarse con cadea perpetua ou a pena capital (para a cal existe unha moratoria en Corea do Sur desde 1997), aínda que se negou a declarar ante os investigadores.

A lei marcial, un recurso legal máis

Segundo un comunicado difundido hoxe polos seus letrados, Yoon está a basear a súa defensa na idea de que a lei marcial foi un simple recurso legal máis á súa disposición durante o agresivo intercambio de golpes que viña mantendo coa oposición no contexto de absoluta falta de consensos e diálogo político que marcou as dúas últimas lexislaturas en Corea do Sur.

O enfrontamento entre o presidente conservador e os liberais do Partido Democrático (PD) viña marcado pola maioría parlamentaria destes últimos, especialmente contundente tras a soada derrota do partido gobernante nas lexislativas de abril e o número récord de mocións de destitucións parlamentarias e vetos presidenciais empregados por ambas as partes desde a chegada ao poder de Yoon en 2022.

Os seus avogados anunciaron que este martes presentarían probas e chamarían testemuñas a declarar para defender a súa argumentación, na que se asegura que o estado de excepción foi unha resposta á "parálise" do Estado xerada pola aprobación de procesos de inhabilitación e recortes orzamentarios por parte do PD no Parlamento.

Tanto isto como a "mala xestión" do sistema de cálculo electoral (os seguidores de Yoon aseguran que os últimos comicios estiveron manipulados e sábese que mandos militares ordenaron rexistrar a Comisión Electoral Nacional durante a lei marcial), aseguran, supoñían unha ameaza para a seguridade económica e política do país.

Perímetro de seguridade

A policía surcoreana creou un perímetro de seguridade infranqueable ao redor das portas do Constitucional, no centro de Seúl, para evitar disturbios como os da fin de semana, cando decenas de seguidores do presidente asaltaron e provocaron desfeitas nos xulgados nos que se aprobou prolongar a súa detención polo menos ata o 28 de xaneiro, unha acción que concluíu con 90 detidos.

En todo caso, uns 4.000 simpatizantes do presidente congregáronse nos arredores do Constitucional lucindo pancartas nas que se lía "Destitución inválida, respecten a Constitución!", "Fóra Partido Comunista de China" ou "Stop the steal!" (Deteñan o roubo!).