Educación e os sindicatos do ensino inician negociacións coas posturas moi distantes
Educación e os sindicatos do ensino inician negociacións coas posturas moi distantes
A Consellería presentou un documento cunha proposta que recolle redución de ratio de alumnos e incrementos salariais e emprazou aos representantes dos traballadores a reunirse o mércores
Os sindicatos de educación cren que a oferta non é aceptable mentres non inclúa a recuperación do horario lectivo
![](https://img-g24-crtvg.flumotion.com/prog24/2023/20231002/mesa-sectorial-educacion-021023.png)
A Consellería de Educación trasladoulles aos sindicatos a súa proposta de mellora do sistema educativo galego. O documento presentado na mesa sectorial prevé medidas como a redución da ratio a 20 alumnos en Infantil e Primaria, incrementos retributivos de ata o 15 por cento para os docentes, e un plan de simplificación das súas tarefas burocráticas.
O director xeral de Centros e Recursos Humanos da Consellería de Educación, Jesús Álvarez, dixo ao termo da reunión que confía en chegar a puntos de encontro cos representantes dos sindicatos CIG, UXT, CC. OO. e ANPE.
Álvarez cualificou a reunión celebrada hoxe de "produtiva" e informou de que os sindicatos expuxeron as súas propostas ao documento inicial enviado pola Consellería; "tomamos nota delas e ímolas analizar", afirmou o director xeral.
A CIG, sindicato maioritario no ensino, critica que o documento da consellería non atende as demandas de recuperación de horario dos profesores nin as medidas que propoñen para mellorar o ensino público. O mércores as dúas partes volverán reunirse tras estudar as propostas.
Suso Bermello, secretario nacional de CIG-Ensino, dixo en declaracións a EFE que o sindicato que representa saíu da reunión "como entrou" e "cun profundo malestar". Explicou que o texto da Consellería é "impresentable" ao non contemplar unha das principais demandas do profesorado como é a recuperación do horario lectivo. Indicou, ademais, que a proposta que se fai de redución de cocientes "é inasumible" e dixo que tampouco hai unha proposta sobre a redución da burocracia nos centros educativos.
Sandra Montero, responsable de Ensino de UXT-Galicia, dixo que cre que a negociación irá "para longo", e en liña co resto de formacións sindicais indicou que o documento en ningún caso se pode asinar se non recolle a recuperación do horario lectivo, unha das principais demandas.