Conxemar, cita pesqueira de referencia, reúne en Vigo 700 empresas de 42 países

Conxemar, cita de referencia internacional para o sector da pesca, reúne a partir deste luns en Vigo 700 empresas de 42 nacionalidades, nun momento clave tras a pandemia e a complexa situación económica internacional.

A XXIII edición da Feira Internacional de Produtos do Mar Conxelados celébrase entre o martes e o xoves, pero o luns xa bota a andar cun congreso promovido conxuntamente coa Organización da ONU para a Agricultura e a Alimentación (FAO).

Tradicional punto de encontro do sector español -precisamente en Galicia, a principal autonomía pesqueira nacional-, é unha mostra de referencia internacional, aínda que este ano a feira pesqueira Seafood de Barcelona rexistrou un número maior de empresas expositoras.

Con todo, o calendario de Conxemar é importante porque precede a campaña do Nadal, un dos momentos principais para a facturación desta industria.

A mostra, situada no recinto feiral Ifevi de Vigo, con 37.000 metros cadrados -un 33 % máis ca en edicións anteriores-, conta con 16 pavillóns internacionais de países como a Arxentina, Chile, a China, Estonia, Letonia, Croacia, o Canadá e Portugal.

A mostra recuperou a participación de países que en 2021 se ausentaron por mor das restricións da pandemia, nun momento en que o sector se cuestiona o futuro tras a covid-19, nun contexto de inflación, cambio climático e crise xeopolítica pola guerra de Ucraína.

Programa

O luns, o congreso Conxemar FAO abordará estes desafíos, coa presenza de patronais, especialistas, economistas e asociacións da industria pesqueira de catro continentes e de países como os Estados Unidos, O Xapón, Italia, Portugal ou Marrocos.

Nesta xornada analizaranse as implicacións políticas e económicas no proceso da inflación, a perda do poder adquisitivo das familias, as perspectivas do sector a medio e longo prazo, tras un atasco loxístico "histórico" e as estratexias de futuro.

O martes inauguran a feira o presidente da Xunta, Alfonso Rueda; a secretaria xeral de Pesca do Goberno central, Alicia Villauriz, e o alcalde de Vigo, Abel Caballero.

O xoves, o ministro de Agricultura, Pesca e Alimentación, Luis Planas, visita a feira e o expositor institucional do seu departamento.

Boas previsións

O presidente de Conxemar, Eloy García Alvariza, subliña a relevancia da feira para as empresas de transformación e comercialización de produtos do mar e da acuicultura, así como as boas previsións.

Ademais, salienta a súa "condición única" como espazo aberto de negociación para materia prima e produtos de maior innovación e valor engadido.