Entra en vigor a lei de intercambio de información de antecedentes penais

Entra en vigor este venres a lei sobre intercambio de antecedentes penais, que permitirá aos presos etarras descontar as penas que cumpriron en Francia e adiantar así a súa saída de prisión.

Tal e como publicou o Boletín Oficial de Estado (BOE) o pasado 19 de outubro, a norma, que traspón unha directiva europea, permítelles acumular as penas cumpridas nun país europeo e contabilizalas para saír antes de prisión.

A rede de apoio aos presos de ETA, Sare, calcula que 52 etarras poderán beneficiarse da reforma legal, dos cales sete poderían saír de prisión antes de que acabe o ano. Corenta e oito están en cárceres do País Vasco e Navarra e os outros catro en Francia

Segundo os seus datos, actualmente hai cento corenta presos de ETA cumprindo condena en cárceres vascos e navarros, en distintos réximes, mais outros catro en Francia.

Para acollerse a esta reforma, cada preso terá que solicitar, a través do seu avogado, que se lle aplique a lei para poder saír antes de prisión.

Non sería o caso do ex-xefe de ETA Francisco Javier García Gaztelu, Txapote. A Audiencia Nacional xa tivo en conta en 2014 a pena imposta por un tribunal francés ao acumular as súas condenas, de modo que previsiblemente este reforma legal non implicaría a súa saída de prisión antes de tempo.

A aprobación desta lei provocou un duro enfrontamento entre Goberno e oposición.

Foi a Asociación de Vítimas de Terrorismo (AVT) a que advertiu de que a norma contiña unha emenda, introducida durante o seu paso polo Congreso por Sumar, que suprimía un artigo e a disposición adicional que impedía, ata o de agora, que os condenados etarras puidesen descontar as penas que cumpriron en Francia.

O texto, coa devandita emenda, foi debatido e aprobado por unanimidade no Congreso e pasou polo Senado sen que ningún grupo introducise vetos nin emendas.

O PP acusou o Executivo de incluír "ás agachadas" a dita emenda e afirmou que apoiou o texto por erro, mentres que no Executivo defenderon que o PP coñecía o que votaba e que o texto é o mesmo que aprobou o Goberno de Mariano Rajoy en 2014.