Epifanio: "Ante o Barça necesitamos unha especial disciplina, concentración e esforzo"

Diego Epifanio salientou a necesidade de cumprir con "os nosos básicos defensivos" para tentar asaltar o fortín do actual líder da Euroliga. Respecto a as claves para poder gañar no Palau Blaugrana, o técnico do Leyma Básquet Coruña indicou que "evidentemente nós traballamos para tentar sacar a primeira vitoria fóra, pero sabemos que é moi difícil. Por todo o que conleva.

Primeiro, por xogar fóra de casa; logo, polo equipo que imos ter enfronte. Estamos a traballar ben esta semana e creo que temos claro que os nosos básicos defensivos téñennos que axudar a competir, aínda sabendo da calidade de todos os xogadores do Barça".

Básicos que resumiu en "poñer o foco en que as canastras do Barça veñan do seu talento, que non teñamos erros defensivos, que non nos afecte moito unha mala decisión que faga que nos anoten ou que que perdamos un balón. E logo tentar xogar á nosa maneira, pero sabemos que é moi difícil. Para poder competir temos que facer moitas cousas ben que dependen da disciplina, a concentración e do esforzo. Pero tamén está o talento que teñen eles, que ás veces é moi difícil de defender".

Ao Barça tocoulle esta semana dobre xornada de Euroliga, ademais a domicilio, o martes contra o Efes turco e a noite do xoves fronte ao Olympiacos grego. 

"Imaxino que eses orzamentos [os máis altos] dan para facer persoais que poidan aguantar a dobre competición."

"Si que é verdade que levan moitos quilómetros, pero evidentemente o Barça viaxa nas mellores condicións posibles. Viaxa mellor que o Básquet Coruña"