ERC presiona para reformar o delito de sedición en plena negociación dos presupostos
ERC presiona para reformar o delito de sedición en plena negociación dos presupostos
Os republicanos piden a equiparación a outras lexislacións europeas
O Goberno di que non hai maioría para a reforma
O Goberno mantén vivo o compromiso de reformar o delito de sedición. Segundo o xornal El País, o executivo non estuda a súa desaparición, pero si a rebaixa á metade dos actuais 15 anos de pena máxima.
É unha das principais esixencias de Esquerra Republicana. Os de Junqueras admiten que hai conversas en marcha aínda que as enmarca na mesa de diálogo bilateral e non nas negociacións para apoiar os presupostos.
Marta Vilalta, voceira de ERC, explica que "non xogaremos á poxa pública sobre unha reforma ou outra. O que lle esiximos ao Goberno español é que faga as reformas necesarias para equipararse aos niveis democráticos dos estándares internacionais".
O ministro de Cultura rebaixa a transcendencia da reforma: di Iceta que non é unha lei de amnistía, senón un axuste da lexislación.
Miquel Iceta di que "é vontade do Goberno proceder a unha reforma do Código Penal que homologue o delito de sedición á formulación que fan outros ordenamentos xurídicos doutros países. É un compromiso que se mantén, que non ten que ver co debate orzamentario".
Oficialmente, o PSOE di que non toca porque non están garantidos os 176 apoios necesarios. A voceira socialista, Pilar Alegría, explica que "hoxe por hoxe non parece que teñamos esa maioría absoluta necesaria para levar a cabo esa reforma".
O Congreso votará e previsiblemente rexeitará esta semana as emendas á totalidade aos presupostos. Despois virá a busca de apoios para sacar adiante as derradeiras contas da lexislatura e, con elas, a derradeira oportunidade dos minoritarios para obter réditos políticos.
