Escasea a oferta de grelo ao pé da N-550
Escasea a oferta de grelo ao pé da N-550
Cada vez hai menos grelo a vender na estrada que une Santiago e Ordes
Á falta de remuda hai que sumar este ano unha colleita nefasta
Xa comezou o mes dos cocidos e as laconadas, pero hai preocupación este ano porque un dos ingredentes estrela escasea. A campaña dos grelos está sendo mala a nivel xeral en toda Galicia, mesmo a nivel doméstico.
Percíbese sobre todo ao pé da estrada N-550 en Ordes, onde xa non hai tantos postos de venda. Nótase que xa non é o que era. Antes en case todas as casas había quen os vendía ao pé da estrada.
"Si, moitos menos, moitos menos, si", comenta Lourdes Méndez.
"Porque os vellos acabamos e os novos non poñedes", apunta Celsa Garabato.
Parar na estrada para comprar os grelos, con todo habendo menos oferta, segue a ser unha tradición.
"Paran, que aínda paran cando non os hai", continúa Celsa.
"Góstannos moito os grelos desta zona", conta unha clienta.
Hai a quen lle cadra de paso, pero tamén hai quen vai a propósito.
"A propósito si, aproveitamos e imos a Santiago, pero si o motivo é mercar os grelos", comenta a clienta.
Este ano a campaña está resultando nefasta, mesmo para os pequenos produtores
"Estanos a ir mal, mal porque hai pouco".
"E choveu moito e despois viñeron estas xeadas e tamén lle afecta".
"Vas aí e polo medio está todo queimado", quéixanse as veciñas de Ordes que venden ao pé da estrada.
Este luns había casas en que non tiñan nada para vender. Escasea o grelo e os prezos soben mesmo ata os 4 euros monllo. E a xente págaos porque saben que están acabados de apañar.
"Eu teño recordos moi bonitos, de ir a Santiago, de estar facendo a carreira, ir facer exames e logo volver pola noite, coller os grelos. Mesmo unha vez nos invitaron a estar coa familia arredor da lareira, facía un frío do demo, e ben, moi bonitos e seguimos coa tradición", recorda a clienta.
