Eslovaquia oponse á entrada de Ucraína na OTAN para evitar unha "guerra mundial"

O primeiro ministro de Eslovaquia, o populista Robert Fico, asegurou hoxe que o seu país bloqueará a entrada de Ucraína na OTAN para evitar así unha guerra mundial.

"Bloquearemos e vetaremos a adhesión de Ucraína á OTAN, porque non sería outra cousa que a base para unha terceira guerra mundial", declarou o xefe do Goberno, que se opuxo a que o seu país siga mandando armas para que a Ucraína se poida defender da agresión rusa.

Fico reunirase o mércores co seu homólogo ucraíno, Denys Schmyha, en Úzhgorod, unha cidade de Ucraína que se atopa na fronteira con Eslovaquia, e indicou que nese encontro presentará un novo paquete de axuda humanitaria.

Non é a primeira vez que o xefe do goberno de coalición entre populistas de esquerdas e ultranacionalistas se amosa contrario a unha eventual entrada de Ucraína na Alianza Atlántica.

Nas declaracións deste sábado o primeiro ministro eslovaco insistiu en que o seu país deixará de fornecer armas dos seus arsenais a Ucraína, pero que si permitirá a venda dese material por parte de empresas eslovacas de defensa.

Así mesmo, tamén defendeu que a Ucraína entre na Unión Europea se cumpre, dixo, as mesmas condicións que os demais países.

Antes do cambio de goberno de Eslovaquia, o pasado mes de outubro, este era un dos máis firmes defensores dentro da Unión Europea da entrega de axuda militar a Ucraína.