España intervirá na demanda contra Israel ante o Tribunal Internacional de Xustiza

España presentou unha declaración de intervención na demanda contra Israel do Tribunal Internacional de Xustiza pola situación en Gaza, anunciou o ministro de Asuntos Exteriores, José Manuel Albares.

Albares, que fixo este anuncio nunha comparecencia de prensa no Palacio de Viana, explicou que España toma esta decisión ante a continuación da operación militar en Gaza e a "enorme preocupación" que suscita a extensión rexional do conflito. 

Dixo o ministro que o obxectivo desta decisión é que a paz regrese a Gaza e Oriente Medio e para iso é urxente que o apoio de todos ao Tribunal para que se respecten as medidas cautelares que ordenou co obxectivo de deter a operación militar en Rafah.

Insistiu ademais na necesidade de que cesen os obstáculos para que chegue a axuda humanitaria á zona e se poña fin á destrución de infraestruturas civís.

"Pedimos unha vez máis o cesamento dos bombardeos, o cesamento do fogo, a liberación inmediata e incondicional de todos os reféns e o acceso urxente e sen restricións de axuda humanitaria á poboación civil", remarcou o máximo representante da diplomacia española.

Albares deixou claro que do que se trata é de axudar ao Tribunal Internacional de Xustiza na súa interpretación, pero deixando claro que "España non toma partido por ningunha das dúas partes no proceso", senón a favor do tribunal para axudarlle no que teña que ser a súa interpretación.

Preguntado polas razóns polas que non se retira á embaixadora española en Israel, como se fixo no caso de Arxentina tras a crise diplomática aberta con este país, Albares asegurou que son "situacións diferentes" e engadiu que España toma as decisións que considera son as mellores en cada caso para defender a dignidade das institucións e para alcanzar os obxectivos de paz en Gaza e Oriente Medio.

En canto a se España é o primeiro país Europeo que intervén no procedemento do Tribunal Internacional de Xustiza, indicou que lle consta a intención de Irlanda e Bélxica de intervir no mesmo sentido e lembrou outros países que si actuaron na mesma liña como México, Colombia ou Chile.

O ministro tamén se referiu á resposta conxunta que anunciou a pasada semana que España preparaba xunto a Noruega e Bélxica tras as críticas de Israel aos tres países por recoñecer o Estado palestino para indicar que constataran que isto "ataques inxustificados" remitiran.

"Non queremos alimentar ningunha escalada nin caer en ningunha provocación", subliñou Albares, quen volveu a insistir en que España "non ten nada, todo o contrario, contra o pobo de Israel nin contra a existencia do Estado de Israel".

Di o Goberno que con esta medida España non toma posición por ningún dos dous bandos. Evita pronunciarse sobre o delito de xenocidio e xustifica a súa decisión na axuda ao Tribunal Internacional na súa interpretación.

Reaccións en España e desde posicións palestinas

A esquerda do PSOE división de opinións. A vicepresidenta Yolanda Díaz aplaude a medida. Pero o ministro de Dereitos Sociais di que non é dabondo.

"Necesitamos medidas de presión económica e comercial para impedir que esta situación siga o seu curso", asegura Pablo Bustinduy.

Na mesma liña apunta Podemos. A súa secretaria xeral, Ione Belarra, pide a través das súas redes sociais ruptura de relacións e embargo a Israel. O Partido popular acusa a Pedro Sánchez de usar o conflito en Gaza como cortina de fume.

"Este é un goberno que se ten que ir a milleiros de quilómetros porque non é capaz de dar resposta ao que ocorre aquí", asegura Miguel Tellado, quen di que a situación no Oriente Próximo non forma parte das prioridades do goberno.

O embaixador de Palestina en España, Husni Abdel Wahed, destacou este xoves que, coa súa intervención na demanda contra Israel do Tribunal Internacional de Xustiza, España actúa "dunha forma coherente cos seus principios" e desexou que "oxalá outros se sumen".

O grupo islamita Hamas, pola súa parte, aplaude a España. O movemento de resistencia islámica di que a decisión española fortalece a xustiza internacional e acusa a Israel de levar a cabo un xenocidio e unha limpeza étnica.