España pide un cesamento do fogo e que a axuda chegue a Gaza de maneira constante

O ministro de Exteriores español, José Manuel Albares, pediu que a axuda a Gaza poida chegar "de maneira constante" e reclamou un cesamento do fogo humanitario en Oriente Próximo.

"Este é o momento do cesamento do fogo", dixo Albares á súa chegada á reunión que os ministros de Exteriores da Unión Europea (UE) celebran hoxe en Luxemburgo.

Esa petición de cesamento do fogo reclamouna o presidente do Goberno en funcións, Pedro Sánchez, no cumio de Paz que este sábado se celebrou en Exipto e Albares trasladará a mensaxe ao resto de ministros europeos.

"Europa ten que falar con claridade sobre o dereito de Israel a repeler os ataques terroristas de Hamas, pero tamén ten que falar con claridade na protección da poboación civil palestina", afirmou o ministro.

"Os europeos temos que falar cunha única voz mirando cara ao futuro. (...) Queremos que sexa un futuro de paz en Oriente Medio e esa paz soamente pasa pola existencia dun Estado palestino que viva en boa veciñanza cun estado de Israel", continuou Albares.

O ministro tamén reclamou a Hamas que libere a todos os reféns capturados e "evitar" que a "espiral de violencia" se estenda ao Líbano e a Xordania.

Neste sentido, Albares dixo que está a falar coas autoridades israelís e cos países árabes para tentar que Hamas libere ao español Iván Illarramendi.

Sánchez reúnese con representantes de xudeus e musulmáns

O presidente do Goberno en funcións, Pedro Sánchez, mantivo senllas reunións cos representantes das comunidades xudía e musulmá. Así, pediu mobilizar todos os esforzos para que cese a espiral de violencia.

"É o momento de mobilizar todos os esforzos para que cese a espiral de violencia e volver a unha solución diplomática e política. O Goberno de España está implicado nese esforzo", escribiu nunha mensaxe en X.

Os encontros producíronse este luns na Moncloa. Primeiro recibiu ao presidente da Federación de Comunidades Xudías en España, Isaac Benzaquen e a continuación co secretario da Comisión Islámica en España, Mohamed Ajana. Xunto a Sánchez estaba o ministro de Presidencia, Relacións coas Cortes e Memoria Democrática en funcións, Félix Bolaños.

Sánchez agradeceu a disposición de ambas as comunidades para "seguir traballando pola paz e a convivencia" e destacou que a española é unha sociedade aberta e tolerante e iso faia máis forte.

Borrell pide unha "pausa humanitaria" en Gaza

Antes desa reunión dos ministros de Exteriores da UE, o alto representante da Unión Europea para Asuntos Exteriores, Josep Borrell, pediu unha "pausa humanitaria" na Franxa de Gaza, xa que polo momento a entrada de axuda para os civís está moi por baixo das necesidades.

“O secretario xeral da ONU (António Guterres) pediuno moito. E, persoalmente, creo que unha pausa humanitaria é necesaria para permitir que entre o apoio humanitario e sexa distribuído”, afirmou Borrell.

Lembrou que, no cumio convocado polo presidente exipcio, Abdelfatah Al Sisi esta fin de semana no Cairo, Guterres fixo unha “chamada dramática” a que entre a axuda humanitaria.

Segundo sinalou, a pausa humanitaria tamén é necesaria para que poidan ser devoltos os reféns israelís que retén Hamas en Gaza.

Borrell fixo fincapé en que os ataques con foguetes de Hamas teñen que deterse, a xente que está secuestrada debe ser liberada “obviamente, como parte de calquera paso cara á distensión”, e é necesario “empezar a pensar en como reavivar o proceso político”.

Na súa opinión, o proceso político entre israelís e palestinos “foi esquecido durante demasiado tempo, as grandes potencias esquecéronse do problema palestino pensando que se ía resolver só”, comentou.

“Pero a prioridade neste momento é que o apoio humanitario entre en Gaza”, recalcou Borrell, e apuntou que Exipto está disposto a deixar pasar aos camións que fan fila en Rafah. “Non quero botar a culpa a ninguén. Pero de feito os camións non están a entrar”, dixo.

Borrell foi tallante en canto a que “temos que mostrar o noso forte apoio a Israel, porque sufriu un dos maiores ataques contra o pobo xudeu, isto ten que ser condenado e facémolo”.

“Pero ao mesmo tempo, temos que ter en consideración aos palestinos que son asasinados, tamén son vítimas de Hamas”, subliñou, e agregou que “temos que mostrar exactamente a mesma preocupación por cada civil que é asasinado”.