Decenas de miles de persoas fan cola en Londres para despedirse de Isabel II

Decenas de miles de persoas forman xa unha fila na beira sur do río Támesis, no centro de Londres, para acceder a partir da 18.00, hora galega, deste mércores e ata o luns á capela ardente de Isabel II, que se instalará no Westminster Hall do Parlamento.

O rei Carlos III e os seus fillos, Guillerme -herdeiro ao trono- e Henrique, camiñarán detrás do féretro da soberana cando á 15:22 horas hora galega empece a procesión que o trasladará á sede parlamentaria desde o palacio de Buckingham.

Unha multitude de cidadáns esperan xa pacientemente a súa quenda para despedirse da raíña, situados, segundo o roteiro oficial, nas inmediacións do Parlamento, cruzando a ponte de Lambeth e pola beira sur do Támesis, onde se espera que a fila chegue a alcanzar oito quilómetros, máis aló da Torre de Londres.

Calcúlase que unhas 750.000 persoas chegadas de todo o país, ademais de turistas, tratarán de acceder á capela, que estará aberta ata o luns ás 7.30 horas (de novo hora galega) cando o féretro será trasladado á veciña abadía de Westminster para celebrar un funeral de Estado.

O Ministerio de Cultura alertou de que quen queira dar o seu último adeus á soberana deberán soportar colas "moi longas" que implicarán unha espera de pé de "moitas horas", con "moi poucas oportunidades de sentar", e que requirirá "posiblemente pasar a noite".

A raíña xacerá nun catafalco cuberto co estandarte real no edificio máis antigo do complexo do Parlamento, velada por gardas e membros da familia real.

Os visitantes pasarán controis de seguridade como os dos aeroportos e as restricións limitan a un só bolso pequeno as pertenzas que se permiten no interior.

As estritas regras impiden gardar sitio a outras persoas ou facer cola en nome doutros, xa que se repartirán unhas pulseiras amarelas na fila que deberá levar todo aquel que desexe entrar na capela ardente.

Roupa adecuada para o variable tempo de Londres, comida e bebida, móbiles ben cargados e medicación básica son algunhas das cousas que o Goberno recomenda levar para esta peregrinación, aínda que no traxecto acharán urinarios portátiles e algúns restaurantes alongarán o seu horario para alimentar ás masas.