O aeroporto londiniense de Heathrow atópase "aberto e completamente operativo"
A terminal tivo que pechar este venres por mor dun incendio nunha subestación eléctrica próxima que fornece as instalacións
A unidade antiterrorista da Policía Metropolitana de Londres asumiu a investigación do lume pero, a priori, descártase a sabotaxe
O aeroporto londiniense de Heathrow está "aberto e completamente operativo" tras o seu peche este venres por mor dun incendio nunha subestación eléctrica próxima que fornece as instalacións.
Os primeiros voos da xornada empezaron a aterrar de novo á primeira hora no aeródromo do oeste de Londres. Porén, tiveron que cancelar varios servizos programados para esta mañá.
Un incendio na subestación de Hayes obrigou a clausurar a terminal este venres, porque quedou sen subministración eléctrica. O peche afectou 1.300 voos e unhas 20.000 persoas.
Este sábado, o aeroporto engadiu varios voos ao calendario e máis persoal para facilitar a normalización do tráfico aéreo. Heathrow pediu desculpas polas alteracións e agradeceu a paciencia dos viaxeiros.
Entre as aeroliñas máis prexudicadas polo peche figura British Airways, que operaba máis da metade das rutas canceladas -unhas 670-. Desde a tarde do venres puido restablecer o servizo de oito voos de longa distancia.
Descartada a sabotaxe a priori
A subestación eléctrica próxima a Heathrow confirmou o venres que a orixe do lume parece "non ser sospeitosa", o que descartaría a priori unha sabotaxe.
A unidade antiterrorista da Policía Metropolitana de Londres (Met) asumiu a dirección da investigación do incendio e as súas pescudas apuntan agora ao equipamento de distribución eléctrica.
"O lume afectou un transformador con 25.000 litros de aceite refrixerante completamente en marcha. Isto xerou un perigo importante debido a que o equipo de alta tensión aínda estaba activo e á natureza dun incendio alimentado por aceite", asegurou o subcomisario da brigada de bombeiros de Londres, Jonathan Smith.
