Europa permitirá que os estados membros concedan axudas estatais para apoiar a economía
Europa permitirá que os estados membros concedan axudas estatais para apoiar a economía
A CE permite dar axudas directas de ata 35.000 euros por empresa afectada nos sectores da agricultura, pesca e acuicultura e de ata 400.000 euros no resto dos sectores
Recoñece que a economía da UE está sendo "gravemente perturbada" pola guerra e as sancións económicas impostas a Rusia
![](https://img-g24-crtvg.flumotion.com/prog24/2022/20220323/comisioneuropea.png)
A Comisión Europea deu luz verde este mércores a un marco temporal de crise para permitir aos estados membros conceder axudas estatais para apoiar a economía polos efectos da guerra rusa en Ucraína, en particular pola suba dos prezos da enerxía.
No novo marco temporal de axudas públicas, a CE permitirá aos gobernos dos estados membros conceder axudas directas de ata 35.000 euros por empresa afectada nos sectores da agricultura, pesca e acuicultura e de ata 400.000 euros no resto dos sectores.
Non será necesario que as axudas estean vinculadas a un aumento dos prezos da enerxía, explicou o Executivo comunitario, xa que "a crise e as medidas restritivas contra Rusia afectan a economía de múltiples formas".
Os gobernos tamén poderán apoiar a liquidez das empresas mediante avais públicos, para que sigan tendo acceso a créditos bancarios, e préstamos con xuros bonificados. Neste caso, a Comisión estableceu límites en relación ao importe máximo do préstamo que se fará en función das necesidades de funcionamento da empresa, tendo en conta a súa facturación, custos enerxéticos e necesidades de liquidez.
O marco temporal das axudas estatais permite compensar parcialmente ás empresas polos elevados prezos da enerxía, especialmente aquelas empresas que consumen moita enerxía, podendo concederse estas axudas en diversos instrumentos, entre eles as subvencións directas.
A axuda que pode recibir unha empresa non poderá superar o 30 % dos custos subvencionables, ata un máximo de dous millóns de euros, aínda que se poderán xustificar axudas adicionais para garantir a continuidade cando unha empresa sufra perdas.
Neste marco temporal, os estados membros poderán conceder axudas de ata 25 millóns de euros para grandes consumidores de enerxía e de ata 50 millóns de euros para empresas de sectores específicos como aluminio e outros metais, fibra de vidro, pasta de papel, fertilizantes ou hidróxeno e numerosos produtos químicos básicos.
Bruxelas recoñece que a economía da Unión Europea está sendo "gravemente perturbada" pola guerra e as sancións económicas impostas a Rusia.
Para tentar remediar isto, o novo marco permitirá aos estados membros conceder axudas limitadas ás empresas afectadas pola crise actual ou as correspondentes sancións e contrasancións. O obxectivo é garantir que sigan tendo suficiente liquidez e para compensalos polos custos adicionais dos prezos excepcionalmente altos do gas e da electricidade, dixo a vicepresidenta executiva, Margrethe Vestager, nun comunicado.