Ex secretario de Portos do Estado di que contratou á empresa do caso Koldo por orde do ministerio
Ex secretario de Portos do Estado di que contratou á empresa do caso Koldo por orde do ministerio
Na súa declaración como investigado, o exdirectivo do ministerio que dirixía Ábalos dixo que Koldo García tivo un papel importante na xestión deses contratos
Neste procedemento están baixo a lupa oito contratos adxudicados por distintos entes da Administración Pública cun importe global de 51.998.434 euros
Un número importante realizouse desde Portos do Estado: 8 millóns de máscaras por 20 millóns de euros
O ex secretario xeral de Portos do Estado, Álvaro Sánchez Manzanares, á súa chegada para declarar como investigado no ‘caso Koldo’, na Audiencia Nacional
O exsecretario xeral de Portos do Estado Álvaro Sánchez Manzanares indicou este mércores ante o xuíz que instrúe o caso Koldo que el cumpriu ordes do Ministerio de Transportes, que nese momento dirixía José Luis Ábalos, para contratar a compra de máscaras durante a pandemia coa empresa Soluciones de Gestión, situada no epicentro da presunta trama de comisións ilegais.
Así o explicaron fontes xurídicas consultadas por Europa Press, que engadiron que o antigo alto cargo respondeu como investigado ás preguntas tanto do fiscal como da súa defensa.
Cabe lembrar que neste procedemento que se instrúe no Xulgado Central de Instrución Número 2 da Audiencia Nacional, do que é titular o maxistrado Ismael Moreno, están baixo a lupa oito contratos adxudicados por distintos entes da Administración Pública cun importe global de 51.998.434 euros.
Destes, un número importante realizouse desde Portos do Estado: 8 millóns de máscaras por 20 millóns de euros. O fiscal quixo saber por que se optou pola empresa Soluciones de Gestión, do investigado Víctor de Aldama. Ante isto, Sánchez Manzanares comentou, segundo estas mesmas fontes, que a orde viña dos seus superiores xerárquicos, aínda que non citou en ningún momento o nome do exministro Ábalos.
Ademais, engadiu que el no momento de optar por esa empresa mostrou as súas dúbidas sobre a capacidade desta para o encargo, aínda que, segundo outras fontes, engadiría que en realidade polo momento de urxencia e polo tipo de contrato expresou dúbidas sobre todas as empresas con que se contrataba.
Sobre a empresa que se contratou para distribuír esas máscaras, Raminatrans S. L., Sánchez Manzanares indicou que foi suxestión do expresidente de Portos do Estado Francisco Toledo, dado que era unha compañía de Castelló e que el a coñecía de cando estivo alí destinado.
O protagonismo de Koldo
Doutra banda, tamén se lle preguntou pola súa relación co exasesor de Ábalos, Koldo García, e segundo as fontes dixo que o coñeceu nesa época, que tivo un papel importante na xestión deses contratos e que tiña protagonismo.
Sobre Aldama, Sánchez Manzanares indicou que descoñecía que papel tiña, pero defendeu que mantiña correos electrónicos con ambos porque eran persoas implicadas na xestión da compra de máscaras e entendía que tiña que informalos tamén.
Segundo as fontes consultadas por esta axencia de noticias, o fiscal do caso, Luis Pastor, centrou as súas preguntas no contido do sumario do caso, pero tamén puxo sobre a mesa o informe de auditoría interna encargado polo ministro de Transportes Óscar Puente.
Nesta causa, o xuíz investiga entre outros a Koldo García, pola presunta trama que pagaría comisións para conseguir adxudicacións para a venda de máscaras na pandemia. A Fiscalía Anticorrupción atribúelles presuntos delitos de organización criminal, branqueo de capitais, suborno, delitos contra a Facenda Pública e tráfico de influencias.
Na declaración deste mércores estiveron presentes tanto as defensas dos investigados como as acusacións populares, entre as que se atopa Hazte Oír, o partido político Vox, Liberum ou Iustitia Europa.
