Liberadas dúas persoas tras envorcar o seu coche na AP-9, en Culleredo
Liberadas dúas persoas tras envorcar o seu coche na AP-9, en Culleredo
As dúas ocupantes que viaxaban no coche quedaron atrapadas, non podendo saír debido ás varandas da estrada
Vehículo envorcado / Concello de Culleredo
Un coche envorcou esta tarde, sobre as 15:55 horas, na AP-9 ao seu paso polo concello de Culleredo (A Coruña), á altura do Burgo, segundo informa o consistorio. As dúas persoas que o ocupaban quedaron atrapadas e, posteriormente, foron liberadas.
Un turismo que circulaba en dirección A Coruña sufriu unha saída de vía xunto ao acceso á área de servizo da autoestrada. O vehículo quedou envorcado no espazo que divide o carril dereito da vía de saída cara á área de servizo.
As dúas ocupantes que viaxaban no coche quedaron atrapadas, non podendo saír debido ás varandas. O Servizo de Emerxencias do Concello de Culleredo procedeu á excarceración das dúas persoas. Ao longo do proceso incorporáronse os Bombeiros da Coruña.
Unha vez foron liberadas recibiron atención do 061, que desprazou unha ambulancia medicalizada. Aparentemente, ambas as ocupantes atopábanse ben, aínda que con golpes polo accidente. A Garda Civil de Tráfico asumiu o atestado. Tamén acudiu o servizo de mantemento de estradas.
