Exteriores afasta a posibilidade de que Xoán Carlos I asista ao funeral de Isabel II
Exteriores afasta a posibilidade de que Xoán Carlos I asista ao funeral de Isabel II
O ministro Albares foi rotundo ao asegurar que "está moi claro quen é o xefe de Estado", en referencia a Filipe VI
O Goberno decidirá conxuntamente coa Casa Real quen representará a España no funeral pola raíña británica
![](https://img-g24-crtvg.flumotion.com/prog24/2022/20220909/rei_xoan_carlos_isabel_II_090922.jpg)
O ministro de Asuntos Exteriores José Manuel Albares afastou a posibilidade de que o rei Xoán Carlos vaia ao funeral da raíña Isabel II, xa que dixo que o rei Filipe VI é actualmente "o xefe de Estado" español, aínda que a decisión a tomarán conxuntamente a Casa Real e o Goberno.
Nunha entrevista en RNE, Albares comentou que non se coñece aínda ningún detalle sobre como serán os funerais de Estado en Londres pola raíña Isabel II, falecida o xoves aos 96 anos, polo que "non convén especular" sobre a representación española.
Preguntado directamente sobre se irá o pai do rei, dixo que a decisión a tomarán de forma conxunta a Casa Real e o Goberno unha vez que as autoridades británicas dean a coñecer os detalles de como será o funeral.
"Non coñecemos ningún detalle. Como sempre se fai nestes casos, o Goberno coa Casa Real vai decidir a mellor representación. Temos un xefe de Estado que é Filipe VI", declarou.
Ademais, recalcou que "está moi claro quen é o xefe de Estado" español e sinalou que o actual rei Filipe VI "tamén representa os lazos familiares" entre as casas reais española e británica, unidas xenealoxicamente pola raíña Vitoria.