Falece con 20 anos Elena Huelva, a moza que contaba o seu día a día cun cancro de ósos

A moza Elena Huelva faleceu este martes aos 20 anos tras padecer durante catro anos cancro.

Neste tempo, converteuse nunha activa voz nas redes sociais con lemas virais como "As miñas ganas gañan".

A Axencia EFE entrevistou a Elena Huelva no seu podcast Tabú Mental, onde a moza sevillana falou sobre como lle afectaba o diagnóstico e como soportaba a situación no seu día a día, o cal mostraba nas súas redes sociais con normalidade.

"As miñas ganas gañan. Ninguén nos prometeu un mañá, vive o presente"

Transfusións de plaquetas ou sangue, analíticas, administración de medicamentos ou do tratamento de quimioterapia eran algúns dos momentos que os seus seguidores vían a diario.

Elena tamén falaba sobre a súa transformación física por mor da medicación e de como sentía respecto diso.

En xaneiro de 2022, a moza publicou o seu primeiro libro, que tiña como título o seu lema "As miñas ganas gañan. Ninguén nos prometeu un mañá, vive o presente".

Tras notar unha dor na perna en 2019, aos 16 anos, a Elena diagnosticáronlle un sarcoma de Ewing, un tumor maligno que se desenvolve sobre todo nos ósos e nos tecidos brandos que os rodean.

Chegou a recibir a alta, pero poucos meses despois de saír do hospital o cancro volveu aparecer, está vez nos pulmóns.

"É moi perigoso, como sabedes. Non fai falta que diga moito máis"

O pasado 4 de decembro a moza comunicou ás súas máis de 800.000 seguidores en Instagram e case 700.000 en TikTok que a súa enfermidade se estendera. "É moi perigoso, como sabedes. Non fai falta que diga moito máis", explicou nun vídeo publicado nas súas redes sociais.

"Quérovos", escribiu en Twitter o luns pasado, unha mensaxe que preocupaba os seus seguidores por un posible desenlace que a súa familia confirmou hoxe na conta a súa Instagram, onde sinalaron que "desde esta mañá Elena báilavos e míravos desde a súa estrela".

As condolencias pola morte da moza non se fixeron esperar. Entre elas destaca a do presidente da Junta de Andalucía, Juanma Moreno, quen agradeceu a Elena dar "luz e esperanza".

"Ti e as túas ganas gañástesnos a todos e quedan para sempre no corazón de moita xente", sinalou.

O caso de Elena lembra a outros mozos que viralizaron o día a día de quen padece o cancro como Pablo Ráez, Carlos Sarriá ou Izarbe Gil.