Avoa, fillo e neto; vítimas mortais no incendio dun edificio na Vila Joiosa
Avoa, fillo e neto; vítimas mortais no incendio dun edificio na Vila Joiosa
O menor, de tan só 5 anos foi achado polos bombeiros abrazado ao seu can
A rápida actuación dos servizos de emerxencia no desaloxo duns 120 veciños evitou maiores danos persoais
Os tres falecidos polo incendio dun edificio de grande altura da Vila Joiosa (Alacant) son unha muller, o seu fillo e o seu neto, este último de tan só 5 anos e que foi achado polos bombeiros abrazado ao seu can.
O alcalde, Marcos Zaragoza, explicou a EFE na porta do edificio de 24 alturas sinistrado que se trata dunha "tremenda desgraza" e que os servizos de emerxencias actuaron con celeridade pero que non puideron evitar a morte desta familia, xunto á súa mascota.
A rápida actuación dos servizos de emerxencia no desaloxo duns 120 veciños evitou maiores danos persoais, principalmente por inhalación de fume, xa que o incendio orixinouse durante unha noite con intenso vento de poñente e "a unha hora na que podería ser aínda maior a traxedia".
O alcalde non ocultou que desde o primeiro momento en que tivo coñecemento do suceso véuselle "á cabeza todo o ocorrido en Campanar", o barrio valenciano onde fai dez días faleceron dez persoas e o lume devorou dous edificios, e sinalou que a construción dos inmobles non ofrece paralelismo porque o da Vila Joiosa ten fachada de cemento, o que evitou unha maior propagación entre plantas.
Os corpos sen vida da avoa, fillo e neto foron levantados por orde xudicial pouca despois das 9:30 horas e foron trasladados ao Instituto de Medicina Legal para a autopsia, e en canto ás causas do lume, os investigadores chegados desde Valencia están aínda determinando a orixe.
"Despertei porque oin os berros da señora. Eu choraba e berraba polo neno, sabía que había un neno e a señora maior". A que fala é a veciña porta con porta da familia que perdeu a vida no incendio.
O incendio iniciouse ás 2:15 horas nunha vivenda situada na planta 11 da torre 3 dunha urbanización situada na Cala da Vila Joiosa, e foron atendidas 15 persoas, xa todos de alta, ademais de obrigar ao desaloxo duns 120 veciños, sen que as lapas se propagasen a vivendas contiguas.
Algúns veciños foron realoxados en hoteis. Todos tiñan moi presente o tráxico incendio de hai dez días en Valencia.
"Veume a cabeza o de Campanar e a hora que era, as tres da mañá a xente está durmindo, os sistemas de alarma funcionaron ben", asegura o alcalde de Vila Joiosa, Marcos Zaragoza.
A Policía Xudicial da Garda Civil xa traballa na zona para esclarecer as causas. A Comunidade Valenciana decretou tres días de loito.
