Feijóo insta a adiantar as xerais a maio ante a "dexeneración" do Goberno
Feijóo insta a adiantar as xerais a maio ante a "dexeneración" do Goberno
Tras o caso Mediador, a lei do "só si é si" e a marcha de Ferrovial considera que a única solución é convocar eleccións
O presidente do PP, Alberto Núñez Feijóo, instou a adiantar as eleccións xerais ao mes de maio, en coincidencia coas municipais, ante a "dexeneración" do Goberno de Pedro Sánchez, por cuestións como o caso Mediador, a lei do "só si é si" ou a marcha de Ferrovial de España.
Na súa intervención este sábado durante o cocido popular do PP da Coruña, dixo que o Goberno "pasou da decepción á deriva, de aí á decadencia e á dexeneración, e debería convocar eleccións xa" porque, ao seu xuízo, "perdeu o crédito e a confianza dos españois".
En relación á marcha de Ferrovial para asentarse nos Países Baixos, reprochoulle a Sánchez que vaia a Europa a "insultar os españois" e os que non queren investir en España.
Sobre o caso Mediador, criticou que os socialistas estean "calados" ante un asunto tan "basto, cutre e bochornoso" e, ademais, "degradando as institucións". Por iso, concluíu que "este Goberno non ten máis solución que as urnas".
"O cambio en España pode empezar en maio, non temos necesidade de esperar ata fin de ano, empecemos o que é urxente de forma urxente", insistiu.
Segundo dixo, o Goberno dedícase a "sinalar culpables e a insultar en lugar de buscar solucións", como coa lei do "só si é si", botando a culpa aos supostos xuíces, chamándolles "fachas con toga", e non a quen "non sabe redactar unha lei porque ten tanta soberbia que nin sabe nin pregunta aos que saben".
Feijóo puxo a Xunta como exemplo de "gobernantes que poñen antes dos seus intereses os intereses xerais", polo que o Goberno de Galicia é "menos entretido que o de España", ironizou, pero "moito máis serio e eficaz", xa que non se están "continuamente descualificándose entre si".
