Feijóo comeza este luns os contactos cos grupos políticos ante o debate de investidura
Feijóo comeza este luns os contactos cos grupos políticos ante o debate de investidura
Complicadas negociacións cun pulso con Vox, a negativa do PNV e á espera dalgún xesto a Puigdemont
O presidente do PP de Cataluña, Alejandro Fernández, rexeitou este domingo o diálogo con Junts, porque a tese esencial desta formación "é que España é unha ditadura dirixida por un rei fascista"
Este luns, o presidente do PP, Alberto Núñez Feijóo, comeza os contactos cos grupos parlamentarios, agás Bildu, para conseguir os apoios que precisa para ser investido presidente do Goberno. De momento, descoñécese o calendario das xuntanzas e quen encabezará a delegación negociadora do PP.
ERC xa adiantou que non participará nos contactos. Junts e o BNG aínda non responderon á convocatoria.
E os socialistas tomarán unha decisión este mesmo luns.
As opcións de éxito de Núñez Feijóo, que conta co apoio do seu partido, de Vox, UPN e Coalición Canaria, pasan por convencer o PNV, de que permita a súa investidura. A outra posibilidade pasa polo partido de Puigdemont.
O presidente do PP catalán, Alejandro Fernández, rexeitou o diálogo con Junts porque a formación independentista é o seu "rival". "Que alguén me diga de que hai que falar con eles", aseguraba nun chío nas súas redes sociais.
O martes pasado, Felipe VI designouno como candidato a tentar a investidura, malia a dificultade e por ser o líder da lista máis votada.
