Feijóo non descarta presentar unha moción de censura contra Sánchez tras as europeas
Feijóo non descarta presentar unha moción de censura contra Sánchez tras as europeas
O presidente do PP deixa a porta aberta a empregar esa "ferramenta" se é "útil no contexto adecuado"
O PSOE cre que estas declaracións son unha mostra da "hipocrisía" do líder da oposición
O Partido Popular considera que o Goberno está cercado pola corrupción política da amnistía e a económica polos casos das máscaras e de Begoña Gómez.
Por iso, nunha entrevista en Antena 3, Alberto Núñez Feijóo abriu este luns a porta a presentar unha moción de censura contra Pedro Sánchez se o PP gañas as eleccións europeas. Nese caso, di o popular, "veremos máis próximo o final do túnel" e amósase disposto a empregar "todas as ferramentas que consideremos oportunas" se se dá "o contexto adecuado" e a moción de censura "pode ser útil".
Para que prospere esa moción, o PP precisaría os votos dalgún dos socios de investidura de Sánchez. E isto afasta a Vox, que xa se desmarcou da iniciativa en caso de negociarse co líder de Junts, Carles Puigdemont.
Para o PSOE, as declaracións de Núñez Fejóo son "puro teatro" e "un exemplo máis de hipocrisía absoluta e de tentar enganar os españois" do líder da oposición. Félix Bolaños, ministro de Presidencia, aféalle que queira pactar "coa ultradereita en España e en Europa" mentres lle roga apoio a Puigdemont para esa hipotética moción.
Para o socio da coalición, Sumar, as palabras de Feijóo "son unha mostra de impotencia e de nerviosismo" ante a proximidade das eleccións europeas.
Segundo a secretaria xeral de Podemos, Ione Belarra, "o señor Feijóo veuse arriba porque o Goberno non goberna".