Ferido grave un home nunha liorta no mercado de Frigsa en Lugo

Un home precisou o venres atención no hospital Lucus Augusti tras recibir varios golpes na cabeza cunha barra de ferro no parque de Frigsa, en Lugo. Ata o lugar mobilizáronse varias patrullas da Policía Local e da Nacional.

Tratouse dunha pelexa entre dous mozos, aparentemente dous vendedores da zona do auditorio, onde se sitúan habitualmente os postos non autorizados. Os mozos discutiron cun home e logo marcharon. Porén, media hora máis tarde, regresaron para bater nel cunha barra de ferro. Foron as testemuñas as que avisaron a Policía Local, que conseguiu localizar os agresores, dous irmáns que foron identificados e trasladados á comisaría.

A vítima sangraba abundantemente pola cabeza, polo que tivo que ser atendido no hospital de Lugo, onde lle colocaron varias grampas.