Ferido grave un turista español tras ser apuñalado no monumento do Holocausto en Berlín
A policía detivo a un sospeitoso e medios locais informan que atoparon un obxeto punzante no lugar dos feitos
Un español de 30 anos resultou ferido de gravidade ao ser apuñalado cun coitelo xunto ao monumento ás vítimas do Holocausto en Berlín. A policía berlinesa informou que a súa vida non corre perigo.
A vítima é un turista que foi atacado sen que se coñeza o motivo. O autor do ataque fuxiu, segundo testemuñas. Ao cabo dunhas horas, a policía detivo a un sospeitoso.
"A comprobación da identidade do sospeitoso está en curso, o mesmo que as investigacións", informou a policía na súa conta de X.
A detención produciuse cando o sospeitoso volveu ao lugar dos feitos e a policía viu que tiña rastros de sangue nas mans. Non posuía documentos de identidade e foi detido sen resistencia.
A identidade deberá ser aclarada comparando as súas pegadas dixitais cos bancos de datos. Aínda non se coñece o transfondo do ocorrido nin se hai unha relación entre o ataque e o lugar onde ocorreron os feitos.
"Cara ás 18.00 horas, un home foi ferido de gravidade entre as columnas do monumento aos xudeus asasinados en Europa. O ferido foi trasladado a un hospital e equipos de rescate están a atender ás persoas que presenciaron os feitos", dixo a policía de Berlín na súa conta de X.
O monumento está situado en pleno centro de Berlín, preto da emblemática Porta de Brandeburgo e das embaixadas de Estados Unidos e Francia. Segundo informacións do diario berlinés Der Tagesspiegel, atopouse un coitelo nese lugar xunto ao monumento.
