Ferido o condutor dunha furgoneta que saíu da vía e caeu por un terraplén na A-52
Ferido o condutor dunha furgoneta que saíu da vía e caeu por un terraplén na A-52
O accidente aconteceu á altura do municipio ourensán de Carballeda de Avia
A vítima, de 21 anos, foi trasladada ao Complexo Hospitalario Universitario de Ourense (CHUO)
Un condutor quedou ferido este luns nun accidente de tráfico ocorrido na A-52, á altura do municipio ourensán de Carballeda de Avia, cando a furgoneta que conducía saíu da vía e caeu por un terraplén.
Segundo informou o CIAE 112-Galicia, o accidente ocorreu pouco despois das 8:30 horas, e foi un particular o que deu aviso a Emerxencias informando de que unha furgoneta saíra da calzada no quilómetro 256 da autovía A-52, ao seu paso polo lugar de Santo Estevo de Nóvoa.
O 112 alertou de inmediato a Urxencias Sanitarias de Galicia, aos bombeiros de Carballiño, ao GES de Ribadavia, á Garda Civil de Tráfico e aos servizos de mantemento da vía.
Pouco despois, outro alertador confirmaba que o único implicado no sinistro conseguira saír do vehículo, tras o que puido ser atendido polos equipos sanitarios desprazados ata o punto.
O condutor, de 21 anos, foi trasladado nunha ambulancia de soporte vital básico ao Complexo Hospitalario Universitario de Ourense (CHUO).
