Festa por dobre partida en Lugo, coas celebracións do San Xoán e do Arde Lucus
Festa por dobre partida en Lugo, coas celebracións do San Xoán e do Arde Lucus
Prevese que ardan máis de 300 cacharelas na xornada máis festeira da cidade
Lugo celebra a xornada máis festeira de todo o ano, xa que coincide o San Xoán co Arde Lucus. A festa de recreación histórica, que estrea a declaración de Interese Turístico Internacional, arrincou coa chegada das tropas romanas, ás que se enfrontaron as hostes galaicas.
Continuará á tarde cun programa cheo de actividades, entre as que figura o chamado solsticio, cunha fogueira.
"Imos facer unha festa no fondo do parque para prender o lume romano e conxugar o San Xoán co Arde Lucus", di Montse Mourelos, Salesiani Luci Augusti.
"Hai unha intervención festiva con outras asociacións onde estará o circo romano. É unha novidade este ano posto que coincide co San Xoán", explica Miguel Ángel Alvelo, do Cohors III Lucensium.
A do Arde Lucus será unha das máis de 300 cacharelas que pola noite arderán en Lugo, unha cidade onde as fogueiras de San Xoán gozan dunha gran tradición. De feito, na praza de abastos disparouse tanto a demanda de sardiñas como a de carne.
Entre as principais luminarias da capital luguesa figuran tamén as de barrios coma Montirón ou A Piringalla, onde prevén repartir, de balde, unhas 4.000 racións de becerro asado.
"Estamos, lentamente, desde as oito da mañá ata as oito da tarde asando eses dous becerros criados con herba verde no Corgo e cunha carne tenriña e riquísima", asegura Ricardo Varela, da Asociación de Veciños San Isidro da Piringalla.
Con fogueiras e con verbenas nos barrios e coa celebración do primeiro Arde Lucus internacional, non se pode negar que a festa está garantida na Cidade das Murallas.
Na Piringalla, cunha gran fogueira, repartiranse de balde 4.000 racións de becerro asado
