Filipe VI asiste ás manobras de combate da princesa Leonor en Zaragoza

A Casa do Rei distribuíu este luns varias fotos da visita que Filipe VI fixo o pasado venres á Academia Xeral Militar de Zaragoza para seguir as manobras e exercicios de combate que desenvolveu a princesa Leonor xunto aos cadetes do seu curso no campo de adestramento de San Gregorio.

Nas imaxes vese ao rei, con uniforme de faena de capitán xeral do Exército de Terra e boina azul, en distintos momentos do exercicio táctico e xunto á súa filla, á que saúda e coa que conversa riseira mentres lle apoia a man no seu ombreiro.

Tamén aparecen xuntos mentres a cadete Borbón Ortiz come de rancho cos demais compañeiros da 22 compañía á que pertence.

No álbum, vese á princesa co uniforme de camuflaxe, portando o fusil de asalto, casco e lentes correndo cara ao helicóptero que participa no exercicio táctico.

A deste luns é a quinta entrega de fotografías da herdeira ao trono con uniforme de militar que a Casa do Rei distribuíu desde que ingresou na academia do Exército de Terra o pasado 17 de agosto.

A última foi o pasado 19 de decembro, cando a princesa estivo nuns exercicios de montaña e de esquí no Pireneo aragonés.

Tamén houbo imaxes das súas primeiras manobras o pasado mes de setembro, nas que aparecía co fusil, uniforme de camuflaxe e a cara pintada no campo de San Gregorio.

A princesa Leonor atópase desde onte, domingo, no campo de adestramento de Los Alijares (Toledo) para completar as manobras e os exercicios de tiro, que se prolongarán ata o vindeiro venres.

O próximo día 28, comezará as súas vacacións de Semana Santa e retomará as clases o 4 de abril.

Tras a parada, a princesa Leonor, de 18 anos, afrontará o seu último trimestre na Academia de Zaragoza.

Entre o 11 e o 24 de maio, terá os exames do segundo cuadrimestre e, posteriormente, ten programado o último período de instrución, que se prolongará ata o 7 de xuño.

O acto de clausura do curso está fixado para o 19 de xuño, aínda que será o 15 de xullo cando se dea por finalizado, e en agosto, ingresará na Academia da Armada de Marín.

A última vez que se viu á herdeira ao trono foi o pasado 6 de xaneiro, cando se estreou xunto aos reis na cerimonia da Pascua Militar no Palacio Real de Madrid.

Desde Zaragoza, Filipe VI desprazouse á estación de Formigal (Huesca), onde se lle viu practicar esquí durante a fin de semana.