Filipe VI admite "o custo persoal" de guiar o seu reinado con "coherencia e integridade"
Filipe VI admite "o custo persoal" de guiar o seu reinado con "coherencia e integridade"
Os reis e as súas fillas saen por primeira vez ao balcón principal do Palacio Real nos actos de celebración do décimo aniversario do reinado de don Filipe
O xefe do Estado condecorou 19 cidadáns por contribuiren a “construír un país mellor”, entre eles, o director da Real Banda de Gaitas da Deputación de Ourense
O lema da conmemoración: "Servizo, compromiso e deber"
Filipe VI prometía hai dez anos nas Cortes "unha monarquía renovada para un tempo novo"
Filipe VI asegurou este mércores que “a coherencia e a integridade”, xunto á Constitución, foron os principios que guiaron a súas decisións e actos nos seus primeiros dez anos de reinado e que sempre tratou de actuar de maneira "íntegra e exemplar", “asumindo incluso o custo persoal que iso poida implicar”.
No seu discurso no Palacio Real de Madrid con motivo do décimo aniversario da súa proclamación, o xefe do Estado subliñou que cumpriu en todo momento o seu compromiso coa Constitución -"á que me cinguín e me cinguirei sempre"- cos valores que sustentan a convivencia democrática e con “os principios éticos e morais que se consideran universais”.
“Sempre crin na importancia de ser coherente cos compromisos asumidos. Esta actitude é a base da integridade e implica ser fieis aos nosos principios e valores en todas as nosas decisións e actos”, remarcou nas súas palabras no Salón de Columnas ante os poderes do Estado, entre eles, o xefe do Goberno, Pedro Sánchez, e os 19 cidadáns anónimos condecorados coa Orde do Mérito Civil.
O desempeño da súa tarefa implicou, segundo o monarca, “esforzarse en escoitar, en discernir o que é correcto do que non o é e en actuar de forma responsable con ese discernimento, asumindo incluso o custo persoal que iso pode implicar”, en alusión ás difíciles medidas que tivo que adoptar sobre o seu pai, Xoán Carlos I, e a súa irmá, a infanta Cristina.
🔴 DEZ ANOS DE REINADO
— G24 (@G24Noticias) June 19, 2024
O xefe do Estado di que a “coherencia e integridade” guiaron esta década, asumindo “o custo persoal”.
Podes seguir en directo os actos conmemorativos do X aniversario do reinado de Filipe VI aquí 👉 https://t.co/YPCoUfwBiR pic.twitter.com/QJeQmx7LYl
Para don Filipe, a “coherencia e integridade son os criterios sobre os que deben basearse sempre os actos da Coroa”, que contribúe así “á estabilidade do sistema institucional e á cohesión da sociedade”.
Abundou en que á Constitución e aos seus valores se axustou nesta década porque son “guía” para o exercicio das súas funcións.
“Foi e é o compromiso dun rei constitucional que transcende a esixencia do deber. O é tamén no plano persoal e oral, como expresión profunda do meu respecto e lealdade ao pobo español, ao que me debo. Hoxe reafírmome con entusiasmo e determinación naquel compromiso que permeou cada xesto e cada palabra na década transcorrida”, salientou.
Ao facer balance do seu compromiso “firme de total entrega a España”, o rei considerou que dez anos non é un período extenso, pero si suficiente en termos “constitucionais, institucionais e persoais”.
O apoio da raíña e das fillas
Filipe VI valorou contar nestes dez anos con “o grande apoio” da raíña Letizia, de quen eloxiou a súa “vontade, dedicación e sensibilidade”. A súa actividade institucional -agregou- contribuíu “enormemente a dar visibilidade e atención ás necesidades das persoas, especialmente as máis vulnerables”.
Tamén se referiu ás súas fillas, de quen destacou que xunto aos mozos da súa xeración empezasen a “vivir e comprender con necesario espírito crítico e afán de aprendizaxe as realidades da vida colectiva e as complexas dinámicas do mundo” coa súa formación na Academia Militar de Zaragoza, no caso da princesa, e no internado de Gales onde a infanta estuda bacharelato.
Na súa mensaxe referiuse ao lema escollido persoalmente por el para conmemorar o décimo aniversario da proclamación: ‘Servizo, compromiso e deber’. “Foron os piares do meu desempeño como rei (…) Son elementos inseparables dun todo, actúan en equilibrio e refórzanse entre si, e articulan o exercicio das miñas responsabilidades en defensa dos intereses xerais de España”, xustificou.
Do servizo, o monarca apuntou que é un principio que “se impregna dos intereses, inquietudes e aspiracións de todos os españois”. E do deber, porque é de onde “emerxe a vontade de actuar sempre do modo máis correcto e de cumprir as obrigacións de maneira íntegra e exemplar”.
Filipe VI dixo sentirse “orgulloso” da sociedade española e confiou en avanzar para conseguir unha sociedade “máis libre, máis responsable, máis diversa e máis tolerante”. Tamén unha sociedade máis unida, forte e cohesionada para facer fronte a calquera desafío. “Sobre esa base seguirei adiante coas miñas obrigacións inherentes á Xefatura do Estado”, prometeu.
19 cidadáns condecorados coa Orde do Mérito Civil
Por cuarta vez, o rei condecorou 19 cidadáns de todas as comunidades autónomas, Ceuta e Melilla por contribuíren, de maneira anónima, a “construír un país mellor” co seu esforzo, traballo e actitude. Persoas que “sen importar a súa orixe, condición ou profesión”, son, ao entender do rei, “actores protagonistas do ben común, tecendo a fibra social con esforzo, ética e humanidade”.
“A Coroa débese á sociedade e por iso, hoxe sodes vós os protagonistas (…) Promovedes as mellores virtudes cívicas que reverten en beneficio do conxunto da sociedade e reforzan a nosa convivencia democrática. Sodes necesarios, sodes importantes (...) grazas por proxectardes esperanza, grazas devolvernos o optimismo, grazas por serdes exemplares”, enxalzou o rei.
🔴 DEZ ANOS DE REINADO
— G24 (@G24Noticias) June 19, 2024
O rei Filipe VI agradece o labor dos 19 condecorados coa Orde do Mérito Civil: "Grazas por proxectar esperanza e devolvernos o optimismo".
Os actos conmemorativos do X aniversario do reinado de Filipe VI, en directo aquí 👉 https://t.co/5Lgdcuc3Ul pic.twitter.com/gvYl6qfKwI
Son a mostra, rematou, de que “hai millóns de españois que traballan con esforzo para ser mellores e facernos mellores”.
Os homenaxeados son 9 mulleres e 10 homes de idades entre os 35 e os 89 anos, que representan ás 17 comunidades autónomas e as dúas cidades autónomas.
Recoñeceuse a profesionais da educación, cultura, sanidade, voluntariado, enxeñería, sustentabilidade, agricultura, gandería ou do sector turístico.
A persoa máis nova (35 anos) en recibir a distinción foi Francisco Bárcenas Gertrudix, natural de Valdepeñas (Cidade Real) onde dirixe unha empresa dedicada ao deseño, fabricación e comercialización de fresadoras CNC, láser CO2 e impresoras 3D.
Pola contra, o cidadán maior en recibir a encomenda foi, con 89 anos, Fernando Reinares Hernáiz (A Rioxa), presidente da Cruz Vermella nesta comunidade durante vinte anos e actualmente voluntario da entidade. Entre os seus proxectos máis relevantes, destaca a culminación do Centro de Refuxiados da Rioxa.
A parte solidaria tamén se recoñeceu no Pai Vicente Berenguer Llopis, de Valencia, que nos seus 50 anos de labor en Mozambique promoveu a escolarización de máis de 60.000 nenos nese país.
Así mesmo, condecorouse o traballo pola integración da poboación musulmá de Melilla de Felisa Padilla Muñoz.
A Orde do Mérito Civil máis musical recibiuna o director da Real Banda de Gaitas de Ourense, Xosé Lois Foxo Rivas (Romeor, Folgoso do Courel, 1950), que desde Galicia leva décadas fomentando e ensinando a miles de mozos este instrumento tradicional.
🔴 DEZ ANOS DE REINADO
— G24 (@G24Noticias) June 19, 2024
O director da Real Banda de Gaitas da Deputación de Ourense, Xosé Lois Foxo, entre os 19 cidadáns condecorados coa Orde do Mérito Civil.
Podes seguir en directo os actos conmemorativos do X aniversario do reinado de Filipe VI aquí 👉 https://t.co/tGlxjVX5a8 pic.twitter.com/7q3XpcsiFu
O ceutí Abdelkader Chaib Haddu foi recoñecido polo seu esforzo pola convivencia e integración dos mozos a través do teatro, a poesía ou a música.
O asesoramento para preservar a biodiversidade do Mar Menor do biólogo mariño Anxo Pérez Ruzafa serviulle para ser o elixido pola Rexión de Murcia.
Tamén se destacou o labor de Arantxa Meca Santo Martín, unha navarra que imparte clases de judo ao alumnado de educación especial e especialista en defensa persoal para a muller.
No ámbito educativo, condecorouse ao canario Calixto Herrera Rodríguez, psicopedagogo na Consellería de Educación do Goberno de Canarias e con 40 anos de servizo docente.
E ao cántabro Alejandro Gallego Cuevas, ás portas a súa xubilación como xefe de servizo de centros na Consellería de Educación.
Recoñeceuse a loita contra trata de Rocío Moura Nieto, que desde Madrid se dedica a atender ás necesidades non cubertas das mulleres explotadas sexualmente e ser ponte entre elas e os servizos públicos.
Representando ao mundo sanitario, a neuróloga de Castela e León María Esther Cubo Delgado, recibiu a condecoración polas súas achegas no estudo da enfermidade de Huntington, unha enfermidade rara que afecta a entre 5 e 7 persoas de cada 100.000.
A axuda a mozas con diabetes de Gemma Salvador Castell serviulle a esta nutricionista catalá para recibir a Orde do Mérito Civil.
A aragonesa María José Arbués Gracia recibiu a Orde polo seu traballo no Museo de Huesca, onde logrou recompoñer totalmente 70 pezas e restaurar unha "innumerable" cantidade de fragmentos.
Por parte de Asturias, destacouse o emprendemento de Tamara Fernández Fernández, que fundou unha compañía que ofrece servizos industriais a empresas.
O sector agrícola está representado por Isabel María Vicens Gelabert, que dirixe a empresa hortofrutícola máis grande das Illas Baleares e a maior produtora de Tomate de Ramellet do mundo.
José Luis Quiñones Plaza foi recoñecido polo seu proxecto de turismo astronómico no corazón da dehesa estremeña.
O veterinario vasco Esteban Arostegui Tolivar foi condecorado pola súa actividade profesional con cabalos, así como a súa contribución ao Servizo de Cría Cabalar das Forzas Armadas.
Por parte de Andalucía, destacouse o traballo da enxeñeira Elisabet Suárez Vargas, especialista en construción sostible.
A familia real presenciou o acto militar no balcón principal do Salón do Trono
Os reis, a princesa Leonor e a infanta Sofía posaron este mércores no balcón principal do Palacio Real, o situado no Salón do Trono, unha escena inédita ata o de agora, desde onde presenciaron o desenvolvemento da substitución solemne da Garda Real, que foi o primeiro dos actos para festexar o décimo aniversario da proclamación.
Se hai unha década a familia real se asomou ao balcón que dá á praza de Oriente, en fronte do Teatro Real, nesta ocasión fixérono no miradoiro que dá ao patio da Armería e á catedral da Almudena ante as unidades formadas da Garda Real, os tres Exércitos e a Garda Civil.
🔴 DEZ ANOS DE REINADO
— G24 (@G24Noticias) June 19, 2024
Chegada dos reis, a princesa Leonor e a infanta Sofía á praza da Armería do Palacio Real.
Podes seguir aquí os actos conmemorativos dos dez anos de reinado de Filipe VI 👉https://t.co/9t7EZ7gWIP pic.twitter.com/aDBvP1IbBt
O balcón principal adornouse cun baldaquino branco e un reposteiro co escudo de España e nas ventás laterais, luciron outros máis pequenos cos emblemas das comunidades autónomas.
Don Filipe, dona Letizia e as súas fillas saudaron coa man o milleiro de cidadáns que seguiron o acto nunha bancada e en cadeiras instaladas na Armería e que os ovacionaron ao facer aparición no balcón.
🔴 DEZ ANOS DE REINADO
— G24 (@G24Noticias) June 19, 2024
A familia real sae ao balcón central do Salón do Trono e comeza o acto de substitución da Garda Real e unidades dos tres exércitos e da Garda Civil na Armería.
A conmemoración dos dez anos de reinado de Filipe VI, en directo 👉 https://t.co/1zaFQ6sT6S pic.twitter.com/RrpOpMSZcy
A diferenza de hai dez anos, cando Leonor de Borbón tiña oito anos e a súa irmá, sete, faltaron á imaxe os reis Xoán Carlos e Sofía, ausentes dos actos previstos hoxe para conmemorar o décimo aniversario do reinado do seu fillo.
Ao poñerse o foco en Filipe VI, a Casa do Rei non considerou xustificada a presenza dos eméritos, como tampouco estiveron nos actos de xura da Constitución da princesa de Asturias o pasado 31 de outubro.
En comparación con outras casas reais europeas, ver a familia real no balcón do Palacio Real é unha imaxe moi pouco habitual.
Ademais do día da proclamación, don Filipe e dona Letizia apareceron xuntos na balconada que dá á praza de Oriente unha década antes, no día da súa voda, o 22 de maio de 2004, cando recibiron a ovación dos cidadáns acompañados polos reis Xoán Carlos e Sofía e os pais da entón princesa, Jesús Ortiz e Paloma Rocasolano.
No caso do miradoiro que dá ao patio da Armería, existe o precedente do 2 de novembro de 1982, cando don Xoán Carlos e dona Sofía, xunto ao príncipe e as infantas Helena e Cristina, estiveron nel co papa Xoán Paulo II, quen dirixiu unhas palabras ás persoas presentes na praza durante a súa visita a Madrid.
A substitución da Garda Real foi o primeiro dos actos previstos no Palacio Real durante a xornada no que participan os reis para festexar o décimo aniversario da proclamación, co lema “Servizo, compromiso e deber” escollido polo monarca.
Este cerimonial, que imita o que se executaba a diario en tempos de Afonso XII e Afonso XIII, faise habitualmente os primeiros mércores de cada mes na Armería coa participación só da Garda Real.
A novidade de hoxe foi o paso da Patrulla Águila, deixando o ronsel das cores da bandeira nacional, e que a garda entrante compuxérona unidades dos tres Exércitos e da Garda Civil, que se quixeron sumar deste xeito á homenaxe a Filipe VI.
🔴 DEZ ANOS DE REINADO
— G24 (@G24Noticias) June 19, 2024
A patrulla Águila sobrevoa a praza da Armería en presenza da familia real.
Podes seguir en directo os actos conmemorativos do X aniversario do reinado de Filipe VI aquí 👉 https://t.co/2kJ9Ul9im7 pic.twitter.com/YXlJKsUbgI
Izado da bandeira
A bandeira de España da praza madrileña de Colón izouse este mércores de forma solemne no primeiro dos actos previstos este 19 de xuño en Madrid para conmemorar o décimo aniversario da proclamación do rei Filipe VI.
O acto estivo copresidido polo presidente do Consello Xeral do Poder Xudicial (CXPX), Vicente Guilarte, e polo presidente do Tribunal Supremo, Francisco Marín, acompañados polo Xefe de Estado Maior da Defensa, o almirante xeral Teodoro Esteban López Calderón.
Celebrouse nos Xardíns do Descubrimento, situados na céntrica praza madrileña de Colón, onde foi izada de forma solemne a bandeira de 300 metros cadrados no mastro de 50 metros de altura.
De forma previa ao izado, Guilarte, Marín e López Calderón pasaron revista a catro secciones, de 27 membros cada unha, pertencentes ao Exército de Terra, á Armada, ao exército do Aire e do Espazo e á Garda Civil, que desfilaron ao redor dos Xardíns do Descubrimento.
Entre os asistentes estiveron o fiscal xeral do Estado, Álvaro García Ortiz, vogais do CXPX e maxistrados do Tribunal Supremo, ademais de autoridades militares e da Garda Civil.
O izado da bandeira en Colón realízase de forma ordinaria unha vez ao mes, pero só en catro ocasiones ao ano faise de forma solemne: o 15 de maio por ser San Isidro Labrador, patrón de Madrid; o 19 de xuño, pola proclamación do rei; o 12 de xullo, pola constitución do Tribunal Constitucional, e o 6 de decembro, polo día da Constitución.
Comienza la celebración del X Aniversario de la Proclamación de S.M. el Rey con el izado de bandera en el Palacio de la Zarzuela.#10AniversarioFelipeVI pic.twitter.com/rlOlaP2Stf
— Casa de S.M. el Rey (@CasaReal) June 19, 2024
Acto de izado de bandeira polo décimo aniversario do reinado de Filipe VI este mércores nos Xardíns do Descubrimento da praza de Colón de Madrid (EFE / Zipi)
O lema "Servizo, compromiso e deber"
"Servizo, compromiso e deber" é o lema elixido persoalmente por Filipe VI para conmemorar o décimo aniversario do seu reinado, acompañado por un emblema que integra o seu escudo de armas; ambos estarán vixentes durante un ano, o período no que a Casa do Rei vai prolongar a celebración con máis actos.
As tres palabras escollidas polo xefe do Estado, encabezadas polo rótulo "X Aniversario", pretenden sintetizar o que foi a liña de actuación do monarca desde que relevou a Xoán Carlos I no trono hai dez anos.
É a primeira ocasión na que don Filipe recorre a unha lenda para ilustrar un aniversario da súa traxectoria á fronte da Coroa.
O deseño do emblema que deu a coñecer a Casa do Rei integra nun lateral o escudo de armas de Filipe VI, aínda que non completo, e a lenda máis centrada.
A composición elaborouse en tres versións: unha con letra branca con fondo de cor carmesí, o do estandarte do rei, e dous en branco e negro, unha co guión tamén vermello semente, e o terceiro con fondo branco.
A tipografía utilizada para o lema e o encabezamento é a “Ibarra”, en caixa alta (maiúsculas), e en caixa baixa (minúsculas).
Por ser a primeira década de reinado, a conmemoración vaise desenvolver durante un ano, en que se pretenden organizar actos e visitas a cidades e municipios pequenos co fin de “achegar os reis ao pobo”, segundo as fontes.
O presidente do Goberno e o líder da oposición felicitan o rei
O presidente do Goberno Pedro Sánchez felicitou este mércores a Filipe VI, no día en que se fan dez anos da súa proclamación como rei de España, por servir con "exemplaridade, lealdade e transparencia" os españois.
Sánchez foi un dos primeiros políticos en felicitar o xefe do Estado na rede social X, onde escribiu a seguinte mensaxe: "Hoxe fai dez anos da proclamación de S. M. Filipe VI. Parabéns por esta primeira década representando e servindo a España con exemplaridade, lealdade e transparencia".
Hoy se cumplen diez años de la proclamación de S.M. Felipe VI.
— Pedro Sánchez (@sanchezcastejon) June 19, 2024
Enhorabuena por esta primera década representando y sirviendo a España con ejemplaridad, lealtad y transparencia.
Tamén o líder do PP Alberto Núñez Feijóo deu parabéns a Filipe VI á primeira hora, cunha mensaxe que publicou na mesma rede social.
"Quero felicitar a S. M. o rei no aniversario da súa proclamación. Durante estes dez anos, Filipe VI foi o español que máis cumpriu co seu deber, e a monarquía, a institución que máis estabilidade achegou ao noso país", escribiu.
Quiero felicitar a S.M. el Rey en el aniversario de su proclamación.
— Alberto Núñez Feijóo (@NunezFeijoo) June 19, 2024
Durante estos 10 años, Felipe VI ha sido el español que más ha cumplido con su deber y la monarquía, la institución que más estabilidad ha aportado a nuestro país. pic.twitter.com/E1p2UsaUXr
Segundo o líder do PP, Filipe VI é "o rei democrático que mantivo coa máxima cordura e un exemplo para todas as institucións, a Constitución, o respecto polos poderes do Estado, e deunos unha estabilidade que lamentablemente nesta última década non deu a política".
No mesmo sentido se pronunciou o portavoz do seu partido, Borja Sémper, ao afirmar que foron "dez anos frutíferos para a monarquía constitucional e a estabilidade do país" e subliñar que o rei "estivo á altura dos españois".
"Moi bo" e "correcto", responderon, respectivamente, o ministro de Presidencia Félix Bolaños e o portavoz do PSOE no Congreso Patxi López, cando lles pediron un balance sobre o reinado de Felipe VI, mentres que Mertxe Aizpurua (Bildu) contestou: "Ben, xa veremos".
O portavoz de ERC Gabriel Rufián considerou un acerto do rei que fixese ver que "é diferente ao seu pai" Xoán Carlos e un erro que siga "perpetuando unha institución que forma parte de corruptelas moi importantes neste país".
