Filipe VI nomea a Camilo Villarino xefe da Casa do Rei en lugar de Jaime Alfonsín
Filipe VI nomea a Camilo Villarino xefe da Casa do Rei en lugar de Jaime Alfonsín
Actualmente é o director do gabinete do alto representante da UE para Asuntos Exteriores
![](https://img-g24-crtvg.flumotion.com/prog24/2024/20240119/camilo_villarino.png)
Filipe VI nomeou o diplomático Camilo Villarino novo xefe da Casa do Rei. Substitúe no cargo a Jaime Alfonsín, quen foi a súa man dereita durante case trinta anos, desde que comezou o seu reinado en 2014 e tamén como responsable da secretaría cando era príncipe de Asturias.
Nun comunicado, a Casa do Rei acordou que Villarino (Zaragoza, 1964) pase a ser o novo responsable da institución a partir do próximo mes de febreiro.
Alfonsín, de 67 anos e natural de Lugo, foi primeiro xefe da súa secretaría (1995-2014) como príncipe e, a partir da proclamación, pasou a ser o xefe da Casa do Rei.
O monarca decidiu que vai seguir contando co "valioso e leal consello" de Alfonsín, a quen nomeará conselleiro privado co fin de que continúe "prestando o asesoramento que requira e desempeñará as funcións que lle encomende", engade o comunicado.
A substitución ten lugar a cinco meses de que Filipe VI conmemore o décimo aniversario do seu reinado e tres meses despois de que a princesa Leonor xurara a Constitución o día que fixo 18 anos, o pasado 31 de outubro.
Villarino conta cunha dilatada experiencia como diplomático, carreira á que accedeu en 1989.
Foi o director do gabinete dos ministros de Exteriores entre 2017 e 2021, polo que inclúe a última etapa do Goberno do PP de Mariano Rajoy e a do PSOE de Pedro Sánchez.
Desde outubro de 2022, é o director do gabinete de Borrell, e antes foi conselleiro político do secretario xeral adxunto para Asuntos Políticos do Servizo Europeo de Acción Exterior en Bruxelas.
O xefe da Casa do Rei, que conta con rango de ministro, é o home de confianza do rei, quen ten potestade para elixilo libremente, como establece o artigo 65.2 da Constitución.
Alfonsín ingresou en 1980 como avogado do Estado, o que lle levou a desempeñar distintas tarefas na Administración, como director xeneral de Cooperación cos Réximes Autonómicos do Ministerio de Administración Territorial.
Desde 1984 ata 1992 foi secretario xeral e xefe da asesoría xurídica de Barclays Bank, e desde 1992 a 1995 exerceu a avogacía no despacho de avogados Uría e Menéndez.