Folga no sector da conserva para reclamar un convenio digno

Paro no sector da conserva. Este venres é o primeiro dos tres días de folga con que queren esixir un convenio digno.

É a primeira folga en decenios no sector español da transformación de peixes e mariscos, e a razón que a motiva é a discrepancia entre a patronal Feicopesca (en que está integrada Anfaco) e os sindicatos na negociación do convenio estatal, que comezou hai un ano e afecta os exercicios entre o 2021 e o 2024.

Os sindicatos solicitaron que os soldos inclúan unha cláusula de revisión salarial vinculada ao IPC, e, segundo fontes de Comisións Obreiras, outra demanda refírese a igualar os grupos 5 e 6 deste sector, que acabaría coa «discriminación» entre homes e mulleres, porque as traballadoras están na categoría de condicións inferiores.

Ás 10:00 da mañá hai convocada unha mobilización diante do edificio da Xunta, en Vigo. Ás 11:00 horas haberá outra concentración na Praza de Galicia de Vilagarcía de Arousa e ás 12:00 horas fronte ao Concello de Boiro.