Francia alerta do estado catastrófico da economía nacional

O primeiro ministro francés, François Bayrou, alertou este martes do estado catastrófico da economía do país, sobreendebedado, sen suficiente produción e cun nivel de traballo por baixo dos seus competidores, o que obriga a poñer en marcha un plan de choque.

Nunha comparecencia xunto á maior parte do seu Goberno, Bayrou asegurou que a situación do país está agravada polas crises internacionais, que obrigan a un incremento do esforzo en defensa, e pola guerra comercial lanzada polo presidente Donald Trump.

"A supervivencia do país está en xogo", advertiu o xefe do Executivo, que reuniu parlamentarios, axentes sociais, asociacións, administracións locais e da Seguridade Social para buscar antes de verán soluciones duradeiras para esa crise.

Bayrou enviou unha mensaxe de urxencia dirixida directamente á opinión pública, no medio das críticas que recibe da oposición: "Só a toma de conciencia dos nosos cidadáns pode apoiar a acción pública", asegurou. O primeiro ministro, que fixo concesións aos socialistas e á extrema dereita para adoptar as contas de 2025, quere agora ir máis lonxe na austeridade e sabe que para iso necesita o apoio popular á falta do político.

O ministro de Economía, Éric Lombard, avaliou en 40.000 millóns de euros o axuste necesario nas contas do ano próximo para manter o déficit público no 4,6 % do PIB, tras o 5,4 % que esperan este ano.

Ante estes datos, Bayrou debuxou un panorama catastrofista, o dunha Francia que "non produce o suficiente e non traballa o suficiente", pero que ten "o nivel de gasto público máis elevado do mundo".

Unha situación que se vén agravando coas recentes crises, desde o "furacán" da invasión de Ucraína, que obrigará a incrementar o gasto en defensa en 3.000 millóns de euros, á guerra comercial lanzada por Trump, que cualificou de "ciclón" de "consecuencias imprevisibles".

Fronte a iso, o primeiro ministro convidou os diferentes axentes a achegar propostas para elaborar os orzamentos de 2026, que deben chegar antes do 14 de xullo próximo, dada a urxencia da situación.

Bayrou marcou algunhas liñas vermellas, calcadas do programa do presidente, Emmanuel Macron, como evitar a subida de impostos, xa moi altos no país e que, dixo, farían fuxir os inversores.

Tamén alertou contra propostas que incrementen a débeda, cuxos intereses custan xa 62.000 millóns de euros anuais e poden chegar aos 100.000 millóns en 2029 se non se reduce o déficit. Por iso, sinalou que as medidas que se adopten deben tender a que Francia cumpra o seu compromiso de déficit orzamentario no 3 % en catro anos.

"Outros países fixérono sen deteriorar o nivel de vida e de satisfacción dos seus cidadáns", asegurou Bayrou, que puxo como exemplos O Canadá e os Países Baixos, á vez que lembrou que o déficit en Francia era do 2,3 % antes da crise do covid.

Apostou por unha "refundación da acción pública" que pase por avaliar o gasto de cada administración para facela máis eficiente e por "revitalizar a actividade" a través dunha menor burocracia administrativa e unha mellora da formación en oficios de futuro.

Todo iso debe conducir a unha reindustralización dun país que, dixo, "lidera sectores punteiros" como a aeronáutica ou o luxo, pero "está ausente na produción de base, que é a que máis consomen os cidadáns".