Hugo Mallo afronta en Barcelona o xuízo oral por un presunto delito de abuso sexual

Hugo Mallo, o que foi capitán do Celta ata o verán do 2023, afronta desde as once da mañá de hoxe no Xulgado Penal Número 19 de Barcelona o xuízo oral por un presunto abuso sexual do que foi denunciado, acontecido o 24 de abril de 2019, no estadio de Cornellà-El Prat, poucos minutos antes do inicio do Español-Celta.

Investigan a Mallo por un presunto tocamento á muller que facía o papel da mascota periquita do conxunto catalán. Enfróntase a unha multa de 24 meses. Esta mesma semana, o marinense despediuse do que foi o seu club no último ano, o Internacional de Porto Alegre brasileiro; días antes, o seu técnico Eduardo Coudet, que tamén o foi en Vigo, avanzaba que tiña que viaxar a España por un tema persoal, en referencia ao xuízo, e que xa non volvería á disciplina do equipo.

No seu momento, unha vez que transcendeu a principios deste ano a existencia da denuncia á que ten que facer fronte e a data do xuízo, Mallo negou de forma categórica os feitos nun comunicado feito público polo seu axente Quique de Lucas.