Hugo Mallo volve a España para ser xulgado por abuso sexual
Hugo Mallo volve a España para ser xulgado por abuso sexual
O seu adestrador no Inter, Eduardo Coudet, anuncia que o xogador pediu permiso para deixar o equipo
Será xulgado o xoves día 11 en Barcelona polo seu presunto delito nun Español-Celta
![](https://img-g24-crtvg.flumotion.com/prog24/2024/20240701/HugoMallo.jpeg)
Hugo Mallo non volverá vestir coa camiseta do Inter, porque o seu contrato acaba este verán e non renovará e porque o futbolista pediu permiso para abandonar a disciplina do equipo brasileiro e así poder viaxar a España e preparar o xuízo que ten pendente como acusado.
Tras o partido do equipo ante o Criciúma Esporte Clube, en conferencia de prensa, o Chacho respondeu sobre a ausencia do que foi capitán do Celta.
"Vou aclaralo coa verdade. Por unha situación persoal, xa nos comunicou que vai saír. Ten que viaxar a España e non sei se imos poder volver contar con el, seguramente non", sinalou.
O tema persoal ao que se refire o arxentino é o xuízo por abuso sexual previsto para este 11 de xullo en Barcelona. Tal e como transcendeu en xaneiro, Mallo foi denunciado por un delito que tería lugar no 2019 no partido de Cornellà fronte ao cadro vigués.
A presunta vítima é unha moza que traballaba como mascota do Español e que asegura que o canteirán celeste introduciu as mans baixo o disfrace da muller e "lle fixo tocamentos nos peitos".