Interveñen 4.000 quilos de cocaína nun cargueiro ao nordés das Canarias e deteñen os dez tripulantes

O Servizo de Vixilancia Aduaneira da Axencia Tributaria interceptou o cargueiro Nivel, de 70 metros de eslora e con bandeira de Tanzania, cando navegaba a unhas 130 millas ao nordés de Lanzarote transportando uns 4.000 quilogramos de cocaína. Tamén detivo os seus dez tripulantes.

O control do cargueiro fíxoo a tripulación do Buque de Operacións Especiais Petrel de Vixilancia Aduaneira, xunto ao patrulleiro da aduana francesa DPF-3, durante a operación Pascal-Lino 2024.

Trátase un proxecto bilateral polo que ambas as aduanas despregan medios navais e aéreos para intensificar a vixilancia e control en diferentes escenarios marítimos cada ano, e que nesta ocasión estaba a ter lugar en augas do océano Atlántico.

Pola súa banda, o cargueiro estaba a ser monitorizado desde o Centro de Análise e Operacións Marítimas en materia de narcotráfico (MAOC-N) con sede en Lisboa e, a nivel nacional, a operación foi coordinada con Policía Nacional e Garda Civil a través do Centro de Coordinación contra o Terrorismo e o Crime Organizado (CITCO).

Unha navegación con manobras erráticas

Neste sentido, aos investigadores chamoulles a atención que o cargueiro leva a cabo unha navegación antieconómica, partindo de Turquía, navegado polo Mediterráneo ata a fronte Atlántica, logo a Serra Leoa e Guinea Bissau sen que cargase ou descargase mercadoría algunha e, tras realizar manobras erráticas, puxese rumbo á Península Ibérica.

A presenza dos medios aeronavais do Servizo de Vixilancia Aduaneira e a aduana francesa na zona fixo posible levar a cabo de maneira áxil a acción operativa sobre este buque e evitar que a droga fose transbordada a outras embarcacións de menor porte e chegase ás costas españolas.

A droga estaba nun compartimento entre adegas

A cocaína atopábase nun compartimento entre adegas do cargueiro con moi difícil acceso e fóra dos corredores principais do mesmo, o que nun primeiro momento dificultou a súa localización.

Finalmente, o operativo culminou este venres coa chegada do Petrel e o cargueiro apresado ao Porto de Arrecife (Lanzarote) para a descarga da droga e posta ao dispor xudicial dos detidos por parte de Vixilancia Aduaneira, Policía Nacional e Garda Civil.