Santórum, expulsado do xuízo tras insultar o policía que liderou a operación Karar

O principal acusado do alixo de 3.800 quilos a bordo do barco Karar, Juan Carlos Santórum, foi expulsado este luns da sala no que se celebra o xuízo deste caso tras chamar "corrupto" e "narcopolicía" ao alto cargo policial que dirixiu a operación que desencadeou a detención do presunto grupo criminal.

Foi aos dez minutos da comparecencia do policía que dirixía o grupo 1 de GRECO Galicia cando Santórum gritou "policía corrupto" e, ante o primeiro reproche da presidenta da sala, asegurou que o dixo porque "estaba a pensar mal", ao que a maxistrada lle solicitou que procurase "non pensar en alto".

"É un narcopolicía", insistiu Santórum, ao que novamente lle pediron que gardase silencio ou sería expulsado da sala.

Unha nova intervención do presunto líder do grupo criminal desencadeou a súa expulsión e, mentres abandonaba o recinto, incidiu: "É un narcopolicía; foi o que trouxo o Karar, non nós".

A principal testemuña da Fiscalía no xuízo do alixo de 3.800 quilos de cocaína a bordo do barco MV Karar continuou coa súa declaración, que efectuou tras un biombo, xa sen Santórum na sala.

O xuízo comezou en abril e a declaración como testemuña do alto cargo policial, que está investigado en Murcia por unha presunta relación co narcotráfico, foise aprazando por motivos de saúde ata a súa comparecencia deste luns.