Irene Montero dá por acabada a relación entre Sumar e Podemos

A exministra de Igualdade Irene Montero, que o sábado foi proposta como candidata de Podemos ás europeas, deu por definitivamente rotas as relacións con Sumar tras pasarse ao Grupo Mixto: "Podemos ten o seu propio camiño".

Iso non quita, explicou, que non poidan falar coa coalición de Yolanda Díaz e co PSOE, pero defenderán en todo momento a súa plena autonomía e o seu obxectivo de transformar a vida da xente, advertiu Montero nunha entrevista en TVE ao referirse á negociación dos orzamentos de 2024.

Unha negociación na que van traballar para que "o bloque democrático estea forte e unido" pero na que o seu obxectivo é mellorar a vida da xente e por iso, dixo Montero, van esixir, por exemplo, que non se compren armas "ao Estado xenocida" de Israel.

Montero esquivou responder se Podemos, ao romper con Sumar, incumpriu o pacto coa coalición, en cuxo punto 10.1 recóllese o compromiso expreso a permanecer no grupo parlamentario durante toda a lexislatura. Limitouse a dicir que a decisión que tomaron "era moi difícil, pero necesaria".

"Buscabamos algo tan sinxelo como intervir no Parlamento, os deputados de Podemos non podían facer política", queixouse a exministra.

Ademais de concorrer ás europeas nas que Montero será cabeza de lista -ten que someterse a primarias-, confirmou que Podemos presentarase tamén ás eleccións galegas e vascas, aínda que sen aclarar se o farán con Sumar ou non.

La voz de las que no se conforman, eso es @Podemos. pic.twitter.com/vlTFFHYLGV

— Irene Montero (@IreneMontero) December 18, 2023

A ruptura con Yolanda Díaz paralizou as negociacións para armar unha coalición en Galicia mentres que en Euskadi si hai un clima favorable a que poidan ir xuntos.

Sobre a súa saída do Goberno, Montero asegurou que "nunca ninguén" lle comunicou que deixaba de ser ministra e, precisamente, seguir no ministerio foi unha das cousas que os morados pelexaron ata o final sen éxito.