Italia aumentará as expulsións de migrantes ao subir un 115,1 % as chegadas en 2023
Italia aumentará as expulsións de migrantes ao subir un 115,1 % as chegadas en 2023
O Goberno xa logrou un aumento do 30 % nas expulsións no último ano e agora quere "aumentar esta porcentaxe"
O papa Francisco denunciou este domingo que "desde principios de ano xa morreron case 2.000 homes, mulleres e nenos" tratando de chegar a Europa
![](https://img-g24-crtvg.flumotion.com/prog24/2023/20230815/20230815InmigrantesItalia.png)
O Goberno italiano que preside Giorgia Meloni aumentará as expulsións de migrantes a partir de setembro próximo, cando aprobará un decreto destinado a reforzalas, despois de que no primeiros sete meses do ano as chegadas aumentasen un 115,1 % respecto ao mesmo período do ano anterior, informou este martes o Ministerio do Interior.
Segundo os últimos datos oficiais, os migrantes que desembarcaron nas costas italianas en 2023 foron 89.158, fronte a 41.435 no mesmo período de 2022, un incremento do 115,1 %, con Tunes substituíndo a Libia como principal país de saída cara a Italia e cun incremento tamén das repatriacións do 28,05 % e das solicitudes de asilo (70,59 %), das que se rexeitaron unha de cada dúas.
"Reforzaremos o sistema de expulsións, especialmente de persoas que demostraron ser perigosas; e poñeremos recursos e procedementos máis rápidos para a implementación dos CPR, os centros onde se detén aos irregulares para ser deportados", dixo o ministro do Interior, Matteo Piatendosi, nunha entrevista publicada este martes no diario 'Il Messaggero'.
Críticas dende a oposición e do Vaticano
A oposición italiana criticou o Goberno de Meloni pola súa xestión da inmigración: "Gritan portos pechados, acabouse o choio e os italianos primeiro, pero a dereita está a demostrar unha incapacidade manifesta na xestión da inmigración", escribiu onte o presidente do progresista Partido Demócrata (PD), Stefano Bonaccini, nas súas redes sociais.
Mentres, continúan os desembarcos en Lampedusa, onde 299 migrantes chegaron desde a medianoite de hoxe con sete pequenas embarcacións, que se suman aos 454 habían que desembarcaron este luns, ademais do cadáver dun mozo atopado nun pequeno bote.
No centro de acollida da illa siciliana, con capacidade para 400 persoas, concéntranse unhas 1.900, das que case 200 son menores non acompañados, mentres en Porto Empedocle, tamén en Sicilia, 1.100 migrantes que se amorean no porto e á pequena illa de Pantelleria chegaron case 300 os migrantes nas últimas horas.
O papa Francisco denunciou este domingo que "desde principios de ano xa morreron case 2.000 homes, mulleres e nenos" tratando de chegar a Europa cruzando o Mediterráneo e pediu "esforzos políticos e diplomáticos" para evitar novas traxedias como o último naufraxio, desvelado por 4 sobreviventes o pasado xoves e no que 41 persoas perderon a vida.