Italia impón penas por xestación subrogada aínda que se faga no estranxeiro

O Parlamento italiano aprobou este mércores definitivamente o proxecto de lei que fai da xestación subrogada un "delito universal", o que permitirá impoñer penas no país por esta práctica mesmo se é realizada no estranxeiro.

A lei, presentada polo partido da primeira ministra, Giorgia Meloni, os ultradereitistas Irmáns de Italia, foi aprobada no Senado por 84 votos a favor e 58 en contra, despois de recibir o beneplácito da Cámara de Deputados en xullo de 2023.

A xestación subrogada ou "ventre de alugueiro" xa está castigada en Italia desde 2004, pero o novo texto faina así mesmo "punible" se leva a cabo no estranxeiro.

En concreto, a lei do 2004 castiga no seu artigo 12 con multas de entre 600.000 e un millón de euros e ata dous anos de cárcere a "quen, en calquera modo, realiza, organiza ou publicita o comercio de gametos ou embrións ou a subrogación da maternidade".

A nova lexislación dispón que nese mesmo artigo se aplique tamén aos italianos que recorran a esa forma de xestación fóra do país.

Trátase dunha lei moi apoiada por Meloni, que en varias ocasións cualificou os 'ventres de alugueiro' de "práctica inhumana".

A súa ministra de Familia, Eugenia Roccella, chegou a ironizar cos fillos froito de maternidade subrogada, asegurando que os de nais do "terceiro mundo custan menos", e o deputado Federico Mollicone asegurou que esa práctica era "máis grave que a pederastia".

Desde a oposición, o voceiro do Partido Demócrata, Alfredo Bazoli, considerou esta lei o resultado de "un paternalismo estatal que transforma Italia nun xuíz ético da moral dos seus propios cidadáns contra os principios do liberalismo político".

Así mesmo sinalou que "ameaza con minar as relacións" cos países que si permiten esta práctica e preguntou como se castigará unha persoa que, por exemplo, teña unha dobre nacionalidade.

A senadora do grupo Verdes e Esquerda Ilaria Cucchi vea como "un acto de desmesurada inhumanidade" contra os pais que recorren a esa xestación que son, dixo, nun 90% heterosexuais.

A do Movemento 5 Estrelas (M5S) Maria Domenica Castellone alertou de que o Goberno de Meloni "está a afacerse a prohibir" e tachou a medida como "propaganda á conta de persoas e nenos nados dun acto de amor".

A voceira de Italia Viva (centro, oposición), Ivan Scalfarotto, avisou que "esta norma está feita para golpear os pais" que recorreron a esta práctica e que "as vítimas colaterais" serán os seus fillos.

Pola contra, a favor votaron os partidos da coalición gobernamental: a conservadora Forza Italia e a ultradereitista Liga. O seu voceiro, Massimiliano Romeo, afirmou que a maternidade subrogada "non é unha cuestión de solidariedade".

A senadora de Irmáns de Italia Domenica Spinelli xustificou a medida para "desincentivar" esa práctica pero sostivo que o seu obxectivo final é dicir "non á violencia contra as mulleres".

En calquera caso, tras esta aprobación, queda por saber que recoñecemento terán os fillos froito de xestacións subrogadas xa presentes en Italia.

O Goberno de Meloni enfrontouse por esta cuestión con concellos como o de Milán. O alcalde deste concello, o progresista Beppe Sala, rexistrou civilmente fillos de parellas homosexuais alegando un "baleiro lexislativo".

O Tribunal Supremo italiano ditaminou en decembro de 2022 que os fillos nados por xestación subrogada deben ser recoñecidos mediante o proceso de adopción e coa aprobación dun xuíz.