Muras presume do seu mel de montaña nunha feira para profesionais e visitantes

Celébrase esta fin de semana no Viveiró, en Muras, a novena edición da Feira do Mel de Montaña, un xeito de honrar a calidade dun produto único, que elaboran as abellas da serra do Xistral a partir do breixo.

Aseguran que é case imposible ser de Muras e non ter panais na casa. Dos seiscentos veciños do municipio, hai un cento de apicultores, ademais dos de fóra do concello que traen as colmeas pola óptima calidade do mel que aquí se produce.

A feira comezou hai nove anos para dar a coñecer a maxia do mel da zona. Na feira tamén se forman os produtores con charlas sobre o manexo axeitado das explotacións. Este domingo, venderase a produción a un prezo mínimo de dez euros o quilo.