Johnson anuncia novas restricións en plena crise pola festa en Downing Street

Sucedeu hai un ano, pero a revelación de que Downing  Street, a oficina do primeiro ministro británico, celebrou unha festa de Nadal cando estaban en vigor duras restricións sociais sumiu a Boris Johnson nunha nova crise que ameaza con socavar o seu liderado .

A risa da exportavoz do Goberno Allegra Stratton nun vídeo filtrado converteuse nunha das imaxes do ano. 

Do festexo había algo máis que sospeitas desde que o diario 'Daily Mirror desvelou a súa celebración hai dez días. Pero unha cousa é ler unha noticia que cita fontes anónimas e outra diferente é observar a entón "cara" do executivo escachar de risa mentres chancea sobre como ocultar a esmorga á prensa.
 

O vídeo difundido onte á noite pola canle ITV mostra un simulacro de conferencia de prensa en que funcionarios de Downing Street preparan a portavoz para as posibles preguntas dos xornalistas. Un dos asesores inquire a Stratton sobre unha suposta festa catro días antes, o 18 de decembro de 2020, ao que ela responde entre risas: "Eu marchei para a casa...".

O Ministerio de Sanidade explicitara só un día antes daquela suposta celebración que non se debían realizar comidas nin festas de Nadal pola rápida expansión do coronavirus.

Nunha xornada politicamente difícil para Johnson, o primeiro ministro convocou pola tarde unha conferencia de prensa para anunciar novas restricións contra a expansión da variante ómicron do coronavirus.

A partir do luns, o Executivo ordena traballar desde a casa cando sexa posible, levar máscaras na maioría de lugares públicos e presentar un pasaporte de vacinación para acceder a clubs nocturnos e espectáculos masivos.

Johnson tratou de salvar a cara pola mañá na sesión de preguntas ao primeiro ministro na Cámara dos Comúns (baixa) e pediu "desculpas sen reservas" polo vídeo, aínda que insistiu en que a festa non tivo lugar, "segundo lle aseguraron". "Se romperon as regras, haberá accións disciplinarias", asegurou.

A Policía Metropolitana de Londres sinalou na noite do martes que está a revisar o material dispoñible para investigar se puido haber violacións das normas anticovid vixentes naquel momento.

Por se fose pouco, este mércores coñeceuse tamén que o Ministerio de Educación celebrou polas mesmas datas outra festa do Nadal, nese caso instigada polo propio titular da carteira,  Gavin  Williamson, defenestrado por Johnson na súa última remodelación gobernamental.