Junqueras di que ERC apostará por un referendo de independencia aínda que "alguén teña que volver ao cárcere"

Esquerra Republicana confirma que apostará polo referendo nesta lexislatura e que o fará con todas as consecuencias.

"Se por facelo algún de nós ten que volver a prisión, volveremos", asegura Oriol Junqueras, presidente dos republicanos.

ERC quere ir por diante de Junts e avanzan que a proposta de referendo xa forma parte das negociacións co PSOE. 

"Nós puxemos sobre a mesa o referendo e estamos esperando que o PSOE poña a súa solución", di Marta Rovira desde Xenebra.

Os socialistas negan calquera negociación sobre o referendo e afirman que non o contemplan nin agora nin no futuro. 

Así o asegura a voceira, Esther Peña: "Nin está enriba da mesa nin é a nosa vontade. Serei rotunda: o PSOE non está en ningunha negociación que fale de rupturas, de referendo e de divisións".

O PP dálle máis credibilidade á palabra dos independentistas que á de Sánchez, ao que acusan de volver Cataluña ao punto de partida.

Borja Sémper, o portavoz popular, di: "O Estado de dereito e a sociedade catalá desactivaron o procés e Sánchez vólveo activar. Só hai que escoitar os independentistas para saber o que vai pasar" 

Os populares tachan de coartada o recurso de inconstitucionalidade que aprobará este martes o Consello de Ministros para frear a iniciativa do Parlament que pide declarar a independencia en Cataluña.