Kamala Harris acada apoios abondos para ser a candidata demócrata á Casa Branca

A vicepresidenta dos Estados Unidos Kamala Harris fíxose este luns co apoio de delegados abondos para garantir o seu nomeamento no Partido Demócrata como candidata ás eleccións presidenciais de novembro, segundo o congresista de California Robert Garcia.

California just voted unanimously to nominate our very own @KamalaHarris for President. Our delegates have put the VP over the required number she needs to be our nominee going into convention!

— Robert Garcia (@RobertGarcia) July 23, 2024

"California acaba de votar unanimemente para nomear a Kamala Harris para presidenta. Os nosos delegados puxeron a vicepresidenta por encima do número requirido que necesita para ser a nosa proposta para a convención!", escribiu Garcia en X.

Para gañar o nomeamento na primeira volta da votación, un candidato necesita o apoio de polo menos 1.976 delegados dun total de 4.000.

Pouco despois de coñecerse a noticia, Harris, a través da súa campaña pola Presidencia, asegurou: "Estou orgullosa de obter o amplo apoio necesario para converterme na proposta do noso partido e, como filla de California, estou orgullosa de que a delegación do meu estado natal axudase".

Podería ser proclamada o 1 de agosto se non hai máis candidaturas

Harris engadiu que espera aceptar o nomeamento formalmente "axiña", algo que podería ocorrer de maneira remota o 7 de agosto, antes de que o 19 comece a Convención Nacional do Partido Demócrata, que escenifica o peche do proceso de primarias.

As promesas de apoio por parte dos delegados son un requisito para Harris. Aínda que delegados poderían cambiar de opinión de aquí á votación en agosto, ningún outro aspirante deu un paso á fronte desde a renuncia á reelección do presidente Joe Biden o domingo.

Harris non se convertería oficialmente na candidata presidencial do partido ata que os delegados voten formalmente nunha votación nominal virtual que se espera que conclúa o 7 de agosto.

A vicepresidenta, que anunciou a súa candidatura o domingo tras a retirada da carreira de Biden, xa é a candidata favorita dos demócratas tras recibir o apoio do mandatario, da expresidenta da Cámara de Representantes Nancy Pelosi e de todos os gobernadores demócratas do país, algúns dos cales soaban como posibles candidatos.

Con todo, poderíanse presentar outros candidatos se conseguen as firmas de polo menos 300 delegados, sen que máis dunha sexta parte veña dun só estado.

Se só un candidato, con toda probabilidade Harris, alcanza o limiar de 300 firmas, a votación virtual podería ter lugar tan pronto como o 1 de agosto, dixeron funcionarios do partido a medios locais este luns, e se hai varios candidatos, a votación levaríase a cabo días despois, pero completaríase antes do 7 de agosto.

Entrementres, se o nomeamento se produce a principios de agosto, a convención demócrata que se celebrará o 19 dese mes en Chicago será unha función puramente cerimonial e unha oportunidade televisiva para a formación política. 

Biden: "Sigo plenamente comprometido. O nome cambiou, pero a misión non"

O presidente estadounidense Joe Biden asegurou este luns que aínda que el xa non se presenta á reelección segue plenamente comprometido na campaña: "O nome cambiou, pero a misión non".

"Sigo plenamente comprometido. Seguimos xuntos nesta pelexa. Non marcho a ningures. (...) Aínda temos que salvar esta democracia. Farei o que Kamala (Harris) necesite que faga", engadiu nunha chamada á súa xefa de campaña, Julie Chavez, un día despois de anunciar que renuncia á carreira á presidencia.

Biden interveu por teléfono pouco antes de que comparecese no seu cuartel de campaña en Wilmington a vicepresidenta Kamala Harris, que el impulsou como a súa substituta para as eleccións do próximo 5 de novembro.

"Prométolles que sempre terán o meu apoio", díxolle ao seu equipo nesa chamada retransmitida durante o encontro.

O presidente, de 81 anos, renunciou a buscar a reelección o domingo. Dixo facelo polo ben do país e do partido e tomou esa decisión tras semanas de presión interna e externa polo seu pobre desempeño durante o debate electoral do pasado 27 de xuño fronte ao exmandatario republicano Donald Trump (2017-2021) e tras lapsos verbais posteriores.

"Trump segue sendo un perigo para a comunidade e para o país", engadiu Biden, que lembrou que segue no cargo ata o traspaso de poderes en xaneiro e que neste tempo ten a intención de facer o máximo traballo que poida.

Hai que seguir centrados, na súa opinión, en conseguir poñer fin á guerra en Gaza.

"Estiven traballando moi de preto con israelís e palestinos para tentar ver como podemos poñer fin á guerra en Gaza e levar de volta á casa a todos os reféns. Creo que estamos a piques de conseguilo. E debemos manter as nosas alianzas. É decisivo. Custoume tempo conseguir esas alianzas", sostivo.

O primeiro ministro israelí Benjamin Netanyahu comeza de feito este martes unha visita a Washington en que ten programado un discurso o mércores perante as dúas cámaras do Congreso.