Kevin renova co Celta ata o ano 2025

Kevin Vázquez renovou o seu compromiso co Celta ata o ano 2025. Club e xogador xa amosaran a súa conformidade para prolongar o contrato antes do final da temporada e agora acaba de plasmarse. 

Coa marcha de Hugo Mallo, Kevin queda como opción no lateral dereito xunto a Mingueza e será un dos capitáns do equipo. O seu peso no vestiario, a súa entrega e o sentimento celeste son factores que influíron para que a dirección deportiva tomase esta determinación. 

Kevin leva cinco temporadas no primeiro equipo. Nunca foi titular pero sempre que o precisou o adestrador cumpriu. Estivo no filial ata os 25 anos amosando a súa consistencia e agora fará o mesmo ata os 32, intre no que rematará este novo contrato.