Kevin Vázquez: “Era unha guerra e saímos ben a disputala”
Kevin Vázquez: “Era unha guerra e saímos ben a disputala”
Vázquez recoñeceu que o seu equipo “interpretou” mellor o xogo na segunda parte
![Foto EFE](https://img-g24-crtvg.flumotion.com/prog24/2024/20240108/celtaamoreb.jpg)
Kevin Vázquez, capitán do Celta, destacou a importancia de alcanzar os oitavos de final da Copa do Rei tras derrotar a domicilio a S. D. Amorebieta nun partido marcado polo estado do céspede de Urritxe.
“Sabiamos o que iamos atopar porque na eliminatoria anterior o campo xa estaba mal, igual o de hoxe estaba un pouco máis enchoupado. Era unha guerra e saímos ben a disputala”, comentou o lateral dereito.
Vázquez recoñeceu que o seu equipo “interpretou” mellor o xogo na segunda parte, cando conseguiron remontar o marcador grazas a unha “maior agresividade” no centro do campo.
“Na primeira parte custounos un pouco ir aos espazos porque non podiamos xogar por dentro nin conducir o balón polo estado do céspede. Foi un partido de moita disputa, dos que a min me gustan, aínda que non sexan moi bonitos de ver. É outro tipo de fútbol, no que hai que adaptarse canto antes, e creo que todos o fixemos”, subliñou.