Lara Hernández e Carlos Martín encabezan a lista oficialista para liderar Sumar

A lista oficialista de Sumar para renovar a dirección ampliada da formación, Grupo Coordinador, que se presentará na segunda asemblea vai estar encabezada pola secretaria de Organización, Lara Hernández, e o voceiro económico e tamén deputado Carlos Martín. No terceiro lugar da candidatura estará o nome de Yolanda Díaz, vicepresidenta segunda do Goberno e ministra de Traballo, quen así permanecería na dirección de Sumar, de gañar a candidatura oficialista.

A asemblea de Sumar vaise celebrar os días 28 e 29 de marzo en Madrid. Con esta asemblea e coa dirección gañadora porán fin á coordinadora interina e colexiada que vén dirixindo a formación desde a dimisión de Yolanda Díaz como líder orgánica do partido, tras os malos resultados das últimas eleccións xerais.

Segundo comunicou Lara Hernández en rolda de prensa,  Yolanda Díaz sería a coordinadora institucional e responsable de acción do goberno de Sumar, "se a asemblea o decide".

A candidatura oficialista conta con membros do núcleo duro de Sumar, como o ministro de Cultura, Ernest Urtasun, no posto cuarto; a voceira no Congreso, Verónica Martínez Barbeiro, en quinto lugar; os secretarios de Estado Joaquín Pérez e Rosa Martínez, en sexto e sétimo lugar; e en oitavo posto figura como principal incorporación o maxistrado e exvicepresidente balear Juan Pedro Yllanes.

Fronte á candidatura oficialista sitúase a candidatura alternativa, unha candidatura que se presentou co nome Sumando por Baleares, que está encabezada por Concepción Matarin e Yanko Ivan Morales.