Máis de 300 detidos en Turquía tras as protestas masivas contra o arresto do alcalde de Istambul

A Policía turca detivo máis de 300 persoas, moitas delas estudantes, en varias operacións policiais paralelas con redadas en residencias universitarias, poucas horas despois das protestas multitudinarias que o venres se prolongaron ata a medianoite, segundo informou este sábado o ministro do Interior turco, Ali Yerlikaya.

O ministro do Interior turco, nun breve comunicado publicado na súa conta de X, elevou hoxe a 343 o número de cidadáns vinculados ás manifestacións masivas contra o arresto do alcalde de Istambul, Ekrem Imamoglu, que foron detidos "en nove provincias" do país.

İstanbul Cumhuriyet Başsavcılığınca yürütülen İstanbul Büyükşehir Belediyesi soruşturması ile ilgili dün gece İstanbul, Ankara, İzmir, Adana, Antalya, Çanakkale, Eskişehir, Konya ve Edirne’de meydana gelen eylemlerde 343 şüpheli yakalandı❗️

Toplumsal düzeni bozmaya, milletimizin…

— Ali Yerlikaya (@AliYerlikaya) March 22, 2025

"Aqueles que buscan perturbar a orde social, ameazar a paz e a seguridade da nosa nación e buscar o caos e a provocación nunca terán unha oportunidade e definitivamente non serán tolerados", di o ministro do Interior.

Pouco antes da medianoite, Yerlikaya cifrara en 97 os arrestados por "danar a propiedade pública e resistirse á lei" nas cidades de Istambul, Esmirna e Ankara.

A cifra de detidos non está moi clara; os diarios principais do país dan números diferentes, pero todos coinciden en que se efectuaron violacións de domicilio en vivendas de estudantes e redadas en residencias universitarias de deferentes cidades, tras as protestas do venres á noite.

En todo o país, millóns de persoas saíron este venres á noite ás rúas respondendo ao chamamento do maior partido da oposición, o socialdemócrata Partido Republicano do Pobo (CHP), para protestar contra a detención do alcalde de Istambul o mércores pasado. Ekrem Imamoglu é o rival principal do presidente de Turquía, o islamista Recep Tayyip Erdogan.