A princesa Leonor chega esta tarde a Marín para iniciar o seu 2º ano de formación militar

Despois dun primeiro período de formación no Exército de terra, en Zaragoza, a princesa Leonor pon hoxe fin ás súas vacacións de verán e vén a Galicia para continuar coa súa formación militar na Armada española.

Trinta e oito anos despois do ingreso de seu pai na Escola Naval, a princesa prosegue os seus estudos castrenses, que rematarán dentro de dous anos tras o seu paso tamén polo Exército do aire e do espazo.

"A formación militar é esencial porque leva consigo valores: compromiso, lealdade, solidariedade cos cidadáns e liderado, que é moi importante para quen vai ser a futura xefa do Estado", declarou a Ministra de Defensa, Margarita Robles, nunha visita ás instalación na ENM horas antes da recepción da Princesa.
 

A futura raíña durmirá nunha liteira, nun cuarto con outras tres gardamariñas. Tamén no comedor, Leonor, chamada a ser xefa das Forzas Armadas, vai ser unha máis. Aínda que o cuartel de alumnos incorporou por razóns de intimidade e seguridade algunhas reformas. 
O ferrolán Pedro Cardona Suanzes, director da escola, seguirá de preto a formación da xa alférez Borbón Ortiz. 

O adestramento físico dun gardamariña inclúe remo, vela, agatuñar polo mastro do patio, atletismo, natación... e moita teoría. Oito horas de clase diarias, en que se incorporan prácticas coas últimas tecnoloxías, como a realidade aumentada.

A navegación en plena tempestade ou a orientación polas estrelas forman parte dun réxime de instrución que na propia Escola Naval de Marín consideran moi esixente e que rematará o vindeiro xullo, tras case cinco meses de cruceiro de instrución a bordo do Juan Sebastián de Elcano.