Liberadas nove mulleres vítimas dunha rede de explotación sexual que operaba en Galicia

A Garda Civil desartella unha organización que se dedicaba ao tráfico de seres humanos con fins de explotación sexual e branqueo de capitais e libera nove mulleres vítimas.

A organización captaba as mulleres "mediante engano, beneficiándose da súa situación de vulnerabilidade" e, unha vez que se atopaban baixo o control dos membros, retiráballes os seus documentos para que non puidesen irse.

Para asegurarse pedíanlles que lles pagasen a débeda económica que contraeran, debendo ser satisfeita coa execución de servizos sexuais baixo ameaza.

Estas mesmas fontes detallaron que a organización se valía dunha "sólida xerarquía" cunha repartición de roles "perfectamente definidos" no relacionado coa captación, traslado e explotación final.

As detencións leváronse a cabo nas localidades do Carballiño, Ourense, A Coruña e Madrid.

A operación, dirixida polo Xulgado de Instrución número 1 do Carballiño, segue aberta e parte das actuacións atópanse baixo segredo de sumario.