Limpeza simultánea dos ríos en 42 concellos galegos
Limpeza simultánea dos ríos en 42 concellos galegos
É a décimo quinta edición da campaña organizada por ADEGA
Un total de 61 asociacións desenvolven este domingo unha campaña de limpeza de ríos en 42 concellos galegos. A campaña, organizada pola organización ecoloxista ADEGA, cumpre xa 15 anos e moitos xa notan os seus beneficios na limpeza e na conciencia ambiental.
Con neoprenos, canoas, botas e sacos de lixo acoden á limpeza, pero tamén a poñer en valor a riqueza ambiental, o bosque de ribeira e mesmo o patrimonio etnográfico. A flora e a fauna son os grandes obxectivos polos que a asociación A Jalleira se uniu á campaña "Móllate polos ríos".
Desta volta atoparon bastante entullo de obra pero notan que cada ano o refugallo diminúe. A limpeza neste caso fíxose no Tamuxe, no treito entre o muíño das Aceñas e o vello matadoiro.
